Ҳамрохон Зарифӣ ба Императори Япония Эътимоднома супорид

Душанбе, 9.12.2015 (АМИТ «Ховар»).- 9 декабри соли 2015 дар шаҳри Токио Сафири Фавқулодда ва Мухтори Ҷумҳурии Тоҷикистон дар Япония Ҳамрохон Зарифӣ ба Аълоҳазрат Императори Япония Акиҳито Эътимоднома супорид.
Пас аз баргузории маросими супоридани Эътимоднома, ки дар Қасри Император баргузор гардид, суҳбати самимӣ дар фазои дӯстӣ доир гардид.
Сафир аз номи Президенти Ҷумҳурии Тоҷикистон Эмомалӣ Раҳмон дуруди самимӣ ва таманниёти сиҳатии комилро ба Аълоҳазрат ва ба мардуми Япония сулҳу субот ва шукуфоиро расонид.
Императори Япония зикр намуд, ки дидорашро бо Ҷаноби Олӣ Эмомалӣ Раҳмон ва суҳбати пурмӯҳтаво хуб дар ёд дорад. Император Акиҳито аз сафир дархост намуд, ки дуруду паёмашро ба Ҷаноби Олӣ Президенти Тоҷикистон Эмомалӣ Раҳмон расонад.
Ҳамчунин Аълоҳазрат дар бораи сафари Сарвазири Япония ба Тоҷикистон ва муваффақона анҷом ёфтани он сухан кард. Сафир Ҳ. Зарифӣ сафари Сарвазири Япония ба кишварамонро муҳим ва самаранок барои ҳар ду кишвар номид.
Император Акиҳито ба сафири Тоҷикистон комёбиҳо дар рисолати муҳимаш баҳри рушди минбаъдаи ҳамкории Тоҷикистону Японияро таманно намуд.
Ҳамзамон суҳбати Сафир бо вазири адлияи Япония Иваки Митсуҳидэ, ки дар маросим  иштирок дошт, баргузор гардид. Зимни он ҷонибҳо роҷеъ ба дурнамои рушди минбаъдаи ҳамкории Тоҷикистону Япония табодули афкор намуданд.