Баррасии вазъи таҳия ва нашри китобҳои дарсию воситаҳои таълимӣ дар ҷаласа бо ҳузури М. Ҷабборӣ

Душанбе, 3.12.2015. (АМИТ «Ховар»). -Дирўз таҳти раёсати муовини Сарвазири Ҷумҳурии Тоҷикистон Марҳабо Ҷабборӣ ҷаласаи якҷояи Шўрои миллии рушди маорифи назди Ҳукумати Ҷумҳурии Тоҷикистон ва Шўрои ҳамоҳангсоз оид ба таҳсилоти касбӣ дар Ҷумҳурии Тоҷикистон баргузор гардид.
Дар ҷаласаи мазкур ду масъала: вазъи таҳия ва нашри китобҳои дарсӣ, воситаҳои таълимӣ ва дастурҳои методӣ барои муассисаҳои таҳсилоти умумӣ ва ибтидоии касбӣ ва ҳолати ба ҷои кор ҳозиршавии мутахассисони ҷавону ҷараёни иҷрои қарори Ҳукумати Ҷумҳурии Тоҷикистон «Дар бораи муқаррар намудани имтиёзҳо ба омўзгорони ҷавон» мавриди баррасӣ қарор гирифт.
Ҷаласаро муовини Сарвазири Ҷумҳурии Тоҷикистон, раиси Шўрои миллии рушди маорифи назди Ҳукумати Ҷумҳурии Тоҷикистон ва раиси Шўрои ҳамоҳангсоз оид ба таҳсилоти касбӣ дар Ҷумҳурии Тоҷикистон Марҳабо Ҷабборӣ ифтитоҳ бахшида, оид ба моҳияти масъалаҳои баррасишаванда дар баланд бардоштани сифати таълиму тарбияи хонандагони муассисаҳои таҳсилоти умумӣ ва ибтидоии касбӣ ибрози назар намуд.
Доир ба масъалаҳои баррасишаванда гузориши муовинони вазири маориф ва илми Ҷумҳурии Тоҷикистон Тоҷинисо Маҳмадова,  Бозоралӣ Одинаев, муовини вазири меҳнат, муҳоҷират ва шуғли аҳолии Ҷумҳурии Тоҷикистон Абдусалом Мирзозода ва сардори Раёсати илму маърифати Дастгоҳи иҷроияи Президенти Ҷумҳурии Тоҷикистон Сайфиддин Давлатзода шунида шуда, инчунин андешаҳои аъзои дигари шўро баён гардиданд. 
Бо назардошти гузоришҳо ва мулоҳизаҳои иброзшуда қарорҳои дахлдор қабул гардиданд.