Дар Душанбе роҳҳои рушди сиёсию иқтисодии давлатҳои Осиёи Марказӣ муҳокима мешавад

Душанбе, 29.12.15. (АМИТ «Ховар»). — «Роҳҳои  рушди  сиёсию  иқтисодии  давлатҳои  Осиёи  Марказӣ  дар  даҳсолаи  дуюми  асри ХХ1: масоили рушд,  лоиҳаҳои  ҳамкорию ҳамгироӣ,  имконоти  ҳамкорӣ» —  чунин  аст  мавзӯи  асосии  конфронси байналмилалӣ, ки бо  ибтикори Маркази  таҳқиқи  геополитикии Донишгоҳи (славянии) Русияю Тоҷикистон  бо  дастгирии  сафорати  Русия  дар  Тоҷикистон имрӯз дар  шаҳри  Душанбе баргузор  мегардад.
Дар  ҷараёни  конфронс  муҳокимаи  лоиҳаҳои ҳамкорию  ҳамгироии  давлатҳои Осиёи  Марказӣ, ҳамчунин  ҳамкории  иқтисодӣ ва  иҷтимоию  фарҳангии   давлатҳои нав  дар  шароити  ташаккули усули нави  рушду  густариш  дар  Осиёи  Марказӣ  дар  назар  аст.
Ғайр  аз  ин  дар  конфронс  масоили  сиёсати   давлатҳои нав  барои  ташкили   низоми  кооперативии  амнияти Осиёи  Марказӣ бо дарназардошти  хавфу  хатар  ва  ситезаҷӯиҳои нав ба  сулҳу  субот баррасӣ  ва  вазъияти  геополитикӣ  дар  минтақаи Осиёи  Марказӣ  барои  соли  2016 пешгӯӣ  карда  мешавад. 
Дар  кори  конфронс  намояндагони  вазорату  идораҳои  кишвар,  намояндагиҳои  дипломатии  муқими   Тоҷикистон ва  коршиносон  иштирок  менамоянд.