Дар Тоҷикистон беҳсозии роҳҳои нақлиёт идома дорад
![](https://khovar.tj/wp-content/uploads/2015/12/Rokhsozi.png)
Душанбе, 30.12.2015 (АМИТ «Ховар»). — Дар вохӯрии вазири нақлиёти ҶТ Шералӣ Ганҷалзода бо намояндаи Агентии Ҷопон оид ба ҳамкории байналмилалӣ (АБҲҶ) бо роҳбарии Шунтаро Каваҳара лоиҳаи «Беҳсозии роҳҳои нақлиёт» баррасӣ гардид.
Бино ба иттилои сардори маркази матбуоти Вазорати нақлиёти кишвар, барномаи мазкур бо дастгирии молиявии Ҷопон, ки 13,2 млн долларро дар бар мегирад, маблағгузорӣ мегардад. 118 адад техника ва таҷҳизот барои сохтмони роҳҳои нақлиётгарди ноҳияҳои Ҳисор ва Қурғонтеппа пешбинӣ шудааст. Инчунин дар доираи лоиҳа ба коршиносони маҳаллии соҳаи хоҷагии роҳ тарзи истифодаи таҷҳизот ва техникаи муосир омӯзонида мешаванд.
Ш. Қавҳара зикр намуд, ки татбиқи лоиҳаи мазкур, ки соли 2013 оғоз шуд ва моҳи июли соли 2016 анҷом хоҳад ёфт, аз тарафи мутахассисони Агентии байналмилалии ҳамкории Ҷопон (АБҲҶ) баҳогузорӣ хоҳад гашт.
Шералӣ Гаҷалзода ба пешрафти лоиҳа баҳои мусбат дода, зикр кард, ки аҳолӣ аз вазъи роҳҳои нав сохташуда қаноатмандӣ изҳор мекунанд.
«Воридоти техника ва таҷҳизот ба зиммаи пудратчии лоиҳа — ширкати ҷопонии «Иточу» гузошта шудааст, иттилоъ медиҳад манбаъ.