Дастовардҳои толибилмони тоҷик дар олимпиадаи Қазоқистон

Душанбе, 15.12.2015. (АМИТ «Ховар»).-Аз 12 то 14-уми декабри соли ҷорӣ дар Ҷумҳурии Қазоқистон олимпиадаи барномасозони АвруОсиё   баргузор гардид.
Дар олимпиада толибилмони литсей-интернати тоҷикӣ-русии “Ҳотам ва П.В.” ва литсейи хонандагони болаёқати шаҳри Душанбе ширкат варзида, бо медалҳои нуқра ва биринҷӣ ба ватан баргаштанд. 
Тибқи иттилои сухангӯи расмии литсей-интернати тоҷикӣ-русии “Ҳотам ва П.В.” Туйчӣ Рашидов дар озмунҳои барномасозии умумирусиягӣ ва  барномасозони АвруОсиё аз Тоҷикистон 7 даста иборат аз се нафарӣ ширкат намуда,  Суруш Давлатзода, Нодир Даминов, Самариддин Шарипов соҳиби медалҳои нуқра, Илҳом Сафаров, Фаррух Каримов ва Азим Темурҷонов соҳиби медалҳои биринҷӣ ва ду гурӯҳи дигар соҳиби дипломҳои дараҷаи 1,2 ва 3 гардиданд. 
Онҳое, ки дар ин озмун барандаи медал шуданд, имкон доранд бидуни супурдани имтиҳон ба гурӯҳҳои буҷавии чандин донишгоҳҳои бонуфузи Русия, аз ҷумла Донишгоҳи техникаи иттилоотӣ ва механикаи оптикии шаҳри Санкт-Петергбург ва Қазоқистон шомил шаванд.