Дорувории ба тариқи қочоқ воридшаванда кам гардид

 Душанбе, 28.12.2015. (АМИТ «Ховар»). —  Солҳои охир миқдори доруҳои аз қайди давлатӣ гузашта ва ба талаботи меъёри сифат ҷавобгў зиёд гардида, миқдори дорувории ба тариқи қочоқ воридшаванда кам гардидааст. Дар ин давра бисёр сохторҳои танзимкунандаи фаъолияти фарматсевтӣ ва муомилоти маводи доруворӣ таъсис дода шуданд. Заминаҳои ҳуқуқии фаъолияти фарматсевтӣ таҳия гардида, ба беҳтар намудани дастрасии маводи доруворӣ мусоидат намуданд. Низоми бақайдгирии давлатӣ, сертификатсиякунонӣ ва танзими воридоти доруворӣ мукаммал карда шуд. 
Бо мақсади таҳкими заминаи меъёрии ҳуқуқии рушди низоми миллии иттилоотии тандурустӣ як зумра барномаҳои миллӣ ба тасвиб расида, дар соли сипаришуда Вазорати тандурустӣ ва ҳифзи иҷтимоии аҳолӣ  дар самти мукаммал сохтани заминаи омории соҳа чорабиниҳои зиёдеро ба анҷом расонид. 
Бо мақсади таъмини эътимоднокӣ ва дастрасии саривақтии иттилоот бо дастгирии Иттиҳоди Аврупо   барномаи компютерии «DHIS2» оғоз гардидааст.