Эмомалӣ Раҳмон Пешвои арзандаи миллати тоҷик аст

Душанбе, 17.12.2015 (АМИТ «Ховар»).-16 декабри соли 2015 дар Кумитаи ҳифзи муҳити зисти назди Ҳукумати Ҷумҳурии Тоҷикистон доир ба қабули Қонуни Ҷумҳурии Тоҷикистон «Дар бораи Асосгузори сулҳу ваҳдати миллӣ — Пешвои миллат» аз ҷониби Маҷлиси намояндагони Маҷлиси Олии Ҷумҳурии Тоҷикистон вохӯрии кормандон баргузор гардид.
Раиси кумита Хайрулло Ибодзода  зимни вохӯрӣ гуфт, ки: «Мардуми шарафманди тоҷик роҳи тайнамудаи муҳтарам Эмомалӣ Раҳмонро  ба ҳайси Роҳбари давлат бо тамоми ҳастӣ ва воқеъбинона дарк мекунанду баҳо медиҳанд, ки он роҳи мушкилу пурпечу тоб, вале роҳи пурифтихору пур аз комёбӣ аст.  
Дар вохӯрӣ аксарияти иштирокдорон, аз ҷумла сардорони Раёсати мониторинг ва сиёсати экологӣ Раҳматулло Хайруллоев, бахши обуҳавошиносӣ Валихуҷа Қурбонов ва шоири маҳбуби мардумӣ Шаҳрия Аҳтамзод ба чунин унвони расмӣ ва эҳтиром пешниҳод гардидани Сарвари сулҳпарвару адолатхоҳ Эмомалӣ Раҳмонро  ҳамаҷониба пуштибонӣ намуда, мавсуфро арзанда ба мақоми Пешвои ҳақиқии миллат донистанд.
Дар вохӯрӣ зикр гардид, ки ғамхориву талошҳои ҳаррӯзаи Роҳбари давлат танҳо ба хотири тараққиёту пешрафти Ватани азиз, барои ояндаи дурахшони Тоҷикистон аст ва барои ҳамин ҳам Ҷаноби Олӣ сазовори унвони «Асосгузори сулҳу ваҳдати миллӣ — Пешвои миллат» аст. 
Ҳамчунин ҳайати иштирокдорони вохӯрӣ барои пешниҳоду қабули қонуни мазкур аз Маҷлиси намояндагони Маҷлиси Олии Ҷумҳурии Тоҷикистон миннатдории хешро баён намуда, изҳор доштанд, ки қабули ин қонун хоҳишу матлаби кулли  мардуми Тоҷикистон мебошад.