Кумаки тоҷикони Федератсияи Русия ба зарардидагони заминларза дар Бадахшон

Душанбе, 11.12.2015. (АМИТ «Ховар) — Заминларзаи дар Вилояти Мухтори Кӯҳистони Бадахшон ба вуқӯъ пайваста, ки сабаби ба вуҷуд омадани хисороти молӣ ва ҷонӣ дар як зумра ноҳияҳои вилояти Бадахшон гардид, тоҷикони Федератсияи Русияро низ бетараф нагузошт.
Бо ташаббуси раиси Маркази фарҳанги тоҷикони Русия ва ҷамъияти «Тоҷикон»-и вилояти Твери Федератсияи Русия Муқим Майбалиев ба суратҳисоби махсуси барои зарардидагон кушодашуда маблағи муайяни пулӣ гузаронида шуд.
Ҳамчунин, Маркази Фарҳанги Тоҷикони Россия ва ҷамъияти «Тоҷикон»-и вилояти Твери Федератсияи Россия тасмим гирифтаанд, ки дар деҳаи Рухчи ҷамоати леҳоти Бартанги ноҳияи Рӯшон ба ҷойи мактаби рақами 35, ки аз офати табиӣ зарар дид, мактаби замонавӣ бо тамоми таҷҳизот бунёд намоянд.
Ин иқдоми накӯ ва ҷавонмардона аз он шаҳодат медиҳад, ки  тоҷикони Федератсияи Русия ҳарчанд аз диёри хеш дуранд, вале ҳамеша дар ғаму шодии мардуми шарифи Тоҷикистон шариканд.