Панҷакентиён ҷонибдори Пешвои миллатанд!

Душанбе, 17.12.2015. (АМИТ «Ховар»). — Сокинони шаҳру деҳоти Панҷакент қабули Қонуни Маҷлиси намояндагони Маҷлиси Олии Ҷумҳурии Тоҷикистонро дар мавриди Асосгузори сулҳу ваҳдати миллӣ ва пешвои миллат эълон доштани Президенти кишвар Эмомалӣ Раҳмон якдилона дастгирӣ менамоянд. Дар ҳақиқат Эмомалӣ Раҳмон ба ин шарафи бузург арзанда аст, зеро ҳанўз аз  рўзҳои нахустини соҳибистиқлолии кишвар ў барои хомўш намудани алангаи ҷанги шаҳрвандӣ, ба Ватан баргардонидани гурезаҳои иҷборӣ заҳмат  кашид ва муваффақ ҳам шуд, ки Тоҷикистон дар як фосилаи кўтоҳи таърихӣ, роҳи ба садсолаҳо баробарро тай намояд.
Мо имрўз бо ифтихор аз иқдомҳои наҷиби Сарвари давлат барои  амалӣ намудани 3 ҳадафи стратегии Ҳукумати ҷумҳурӣ — аз бунбасти коммуникатсионӣ раҳонидани кишвар, таъмини амнияти озуқаворӣ ва расидан ба истиқлолияти энергетикӣ сухан меронем. Таҷдиди шоҳроҳи Айнӣ-Панҷакент аз ҷумлаи чунин иқдомҳои Эмомалӣ Раҳмон аст, ки онро садсолаҳо на танҳо мардуми Панҷакент, балки тамоми водии Зарафшон орзу мекарданд.
Маҳз  сиёсати дурандешонаи Сарвари муаззами Тоҷикистон Эмомалӣ Раҳмон буд, ки имрўз Ватани моро бештар аз 100 давлати дунё ба расмият шинохтанд.
Мо панҷакентиён итминони комил дорем, ки Эмомалӣ Раҳмон минбаъд ҳам барои пешрафти соҳаҳои мухталифи хоҷагии халқ ва ободии кишвару осудагии мардум чун фарзанди фарзонаи миллат хидмат хоҳад кард.

Мудири кафедраи      
«Назарияи иқтисодӣ ва идоракунӣ»-и 
Донишкадаи Омўзгории Тоҷикистон
дар шаҳри Панҷакент Наҷмиддинов Фирдавс