Рушди воқеии иқтисодиёти ҷумҳурӣ дар сатҳи нисбатан муътадил- 6,0% нигоҳ дошта шуд

Душанбе, 3.12.2015. (АМИТ «Ховар»).-Идомаёбии бӯҳрони сиёсӣ-иқтисодӣ ва ноустувории молиявӣ дар як зумра мамлакатҳои ҷаҳон, аз ҷумла дар Русия ва мамлакатҳои ҳамсарҳад таъсири манфии худро ба вазъи иқтисодиёти ҷумҳуриамон расонида истодааст.      
“Раванди мазкур аз лиҳози омилҳои иқтисодию молиявии берунӣ ба пастравии нархҳои ҷаҳонии нафт (то 60%) ва дар ин замина коҳиш ёфтани интиқоли пулии шахсони воқеӣ (зиёда аз 35%) ва воридоти асъори хориҷӣ вобаста буда, таъсири он ба пастравии қурби пули миллӣ, кам гардидани қобилияти харидории аҳолӣ, сатҳи талабот, воридоти молҳо (21,8% дар 10 моҳ), даромади буҷети давлатӣ ва фаъолнокии бахшҳои алоҳидаи иқтисодиёти кишвар, бахусус хизматрасонӣ (-6,5% дар 10 моҳ) расонид”,-гуфт раиси Бонки миллии Тоҷикистон Ҷамшед  Нурмаҳмадзода 2 декабр дар ҷаласаи Маҷлиси намояндагони Маҷлиси Олии Ҷумҳурии Тоҷикистон 
Бино ба гуфтаи Ҷ.Нурмаҳмадзода,  новобаста аз ин, дар 10 моҳи соли равон рушди воқеии иқтисодиёти ҷумҳурӣ дар сатҳи нисбатан муътадил — 6,0% (рушди соҳаҳои сохтмон — 22,1%, саноат — 12,1%, ва кишоварзӣ -3,0%) нигоҳ дошта шудааст .
Сатҳи таваррум нисбат ба соли қаблӣ паст гардида, андозаи он ба 4,1 % баробар гардид, ки ин нисбат ба ҳамин давраи соли гузашта 2 банди фоизӣ камтар мебошад. 
“Ба ин раванд дар баробари татбиқи сиёсати самарабахши монетарию макроиқтисодӣ, инчунин як силсила омилҳо, аз қабили паст гардидани индекси нархҳои ҷаҳонии мол ва ашёи хом (бахусус, маводи ғалла ва сӯзишворӣ), коҳиши сатҳи даромад ва талаботи истеъмолии аҳолӣ, зиёд гардидани истеҳсолоти маводи хӯроквории дохилӣ (хусусан, сабзавот ва меваҷот) таъсир расонид”-илова намуд раиси БМТ.