С.Лавров ва Ф.Могерини рӯйхати гурӯҳҳои террористиро муҳокима намуданд

Душанбе, 04.12.15. (АМИТ «Ховар»). — Роҳбари  дипломатияи Иттиҳоди  Аврупо  Федерика Могерини ва  Вазири  корҳои  хориҷии  Русия  Сергей  Лавров  вазъи  таҳияи   рӯйхати  гурӯҳҳои террористӣ  ва   намояндагони  мухолифин дар  ҷараёни  раванди  ҳалли  вазъияти  Сурияро, ки  дар  шаҳри  Вена  интишор  шудааст,  мавриди  муҳокима  қарор  доданд, гуфта  мешавад  дар  баёнияи хадамоти  сиёсати  хориҷии Аврупо.
«Ф.Могерини  ва  С.Лавров перомуни  бӯҳрони   Сурия дар  бораи   зарурати  нигоҳ  доштани  раванди  дар  шаҳри  Вена   оғозёфта ва  ноил  шудан  ба   натоиҷи  мушаххас  табодули  афкор   намуданд. Онҳо  дар  ин  росто иқдомоти   минбаъдаи   раванд ва,  аз  ҷумла,  кореро, ки  бояд  дар  мавриди  таҳияи  рӯйхати  гурӯҳҳои террористӣ ва намояндагони  мухолифин  барои  муколама бо режим иҷро  гардад,  муҳокима  намуданд. Муколамаро  бояд вакили   махсуси  СММ  дар   ҳошияи  нақшаи  дар  шаҳри  Вена  мутобиқшуда  оғоз  намояд», — хабари Хадамоти  сиёсати  хориҷии Аврупоро иқтибос  меорад РИА «Новости».
С.Лавров  ва  Ф.Могерини  рӯзи  панҷшанбе  дар  ҷараёни  ҷаласаи САҲА дар  Белград  мулоқот анҷом  доданд. 
Ёдовар  мешавем, ки 14  ноябр  дар  Вена  мулоқоти байналмилалӣ  оид ба  Сурия  баргузор гардид. Иштирокдорони  гуфтушунид аз  рӯи  бархе   гурӯҳҳои террористон созиш ба  даст оварда, «Давлати  исломӣ» ва «Ҷабҳат -ан — Нусра» — ро  ба рӯйхати  созмонҳои террористӣ  дохил  намуданд. Онҳо ҳамчунин  тасмим  гирифтанд, ки  гуфтушунидҳои  ҳукумати кишвар  ва  мухолифин  бояд  на  дертар  аз 1  январи  соли  оянда  оғоз  ёфта,  тайи  18  моҳ  дар  ҷумҳурӣ  бояд  аз рӯи  конститутсияи  нав  интихобот  баргузор шавад. 
С.Лавров  дар  ҳошияи ҷаласаи Шӯрои  вазирони   корҳои  хориҷии  САҲА ҳамчунин  бо   котиби  давлатии  ИМА Ҷон  Керри  мулоқот анҷом дод. Лавров  пеш  аз  оғози  гуфтушунид бинобар  рух додани  оташфишонӣ  дар  маркази  иҷтимоии  шаҳри Сан — Бернаринои  иёлати Калифорния, ки бар  асари  он 14  нафар  ба  ҳалокат расиданд, изҳори  тасаллият  намуд.