Ҳукумати Ҷопон сохтмони бунгоҳи тиббии ноҳияи Ҳамадониро анҷом дод

Душанбе, 17.12.15. (АМИТ «Ховар»). — Дар  шаҳри  Душанбе   маросими анҷоми лоиҳаи «Бунёди  бунгоҳи  тиббӣ дар  деҳаи  Янгийӯли  ҷамоати  Чубеки  ноҳияи Мир Саид Алии  Ҳамадонӣ» бо  иштироки   сафири  Ҷопон  дар  Тоҷикистон Такаши Камада ва  раиси  ноҳияи  Ҳамадонӣ  Абдуқодир  Вализода баргузор  гардид. 
Ҳукумати  Ҷопон  барои татбиқи  лоиҳаи  мазкур  дар   доираи  лоиҳаҳои  «ёрии  маҷҷонӣ барои  табақаҳои  васеи  аҳолӣ  ва  амнияти  гуманитарӣ (GGP)»  бештар  аз  88  ҳазор  доллари  ИМА тахсис дод. 
Бунгоҳи  ягонаи  тиббии  деҳаи  Янгийӯли  ноҳияи  Ҳамадонӣ  28 — 29  марти  соли 2013 бар  асари  обхезӣ ба  андозаи  зиёд  зарар  дида буд. Сокинони  деҳаи  мазкур, ки имконияти ба муассисаҳои  наздиктарини  тиббӣ  рафтанро   надоштанд, маҷбур  буданд, ки  ба беморхонаи  марказии  ноҳия  раванд, бинобар  ин  табибони  маҳаллӣ  беморонро  дар  манзилашон  табобат  мекарданд. 
Баъди  татбиқи  муваффақонаи   лоиҳа  дар  деҳаи Янгийӯл  бинои  нави бунгоҳи тиббӣ сохта шуд, ки  акнун сокинони  деҳа  метавонанд  аз хидматрасонии хушсифати тиббӣ бархӯрдор  шаванд.