25 январ-Иди касбии кормандони ҳифзи иҷтимоӣ

Душанбе, 26.01.2016 (АМИТ «Ховар»).- Соли дуюм аст, ки дар Тоҷикистон 25 январ ҳамчун рӯзи иди касбии кормандони ҳифзи иҷтимоӣ ҷашн гирифта мешавад. Бахшида ба ин ҷашн, дирӯз дар Вазорати тандурустӣ ва ҳифзи иҷтимоии аҳолӣ ҷаласаи тантанавӣ ба ифтихори иди касби кормандони ҳифзи иҷтимоӣ доир гардид, ки дар он роҳбарияти вазорат, кормандони соҳаҳои ҳифзи иҷтимоӣ ва роҳбарони муассисаҳои ҳифзи иҷтимоии аҳолӣ ширкат доштанд. Муовини якуми вазири тандурустӣ ва ҳифзи иҷтимоии аҳолӣ Лола Бобоҳоҷиева зикр намуд, ки аз ҷониби Асосгузори сулҳу Ваҳдати миллӣ, Пешвои миллат, Президенти кишвар мухтарам Эмомалӣ Раҳмон диққати махсус ба табақаи ниёзманди аҳолӣ дода мешвад ва аз ин хотир маоши кормандони соҳаи иҷтимоӣ ба андозаи 25% баланд бардошта мешавад. «Ин дастгириҳои Ҷаноби Олӣ моро водор месозанд, ки боз ҳам беҳтару хубтар кор кунем,”-илова намуд муовини якуми вазир.
Дар ҷаласа 15 нафар аз кормандони соҳа бо унвони сарисинагии “Аълочии соҳаи ҳифзи иҷтимоӣ” ва фаъолони дигар бо “Сипоснома” ва “Ифтихорнома”-и Вазорати тандурустӣ ва ҳифзи иҷтимоии аҳолии Ҷумҳурии Тоҷикистон сарфароз гардонида шуданд.