Ҷашни шоири риёзидон

Ваҳдат, 06.01.2016. (АМИТ «Ховар»). — Ба муносибати 60-умин солгарди узви Иттифоқи нависандагони Тоҷикистон, омӯзгори фанни математикаи муассисаи таҳсилоти миёнаи умумии №25, котиби масъули маҷаллаи «Бахтофарони Ваҳдат» Абдусаттори Раҳмон дар Кохи «Маърифат»-и шаҳри Ваҳдат чорабинии адабии фарҳангӣ доир гардид. Абдусаттори Раҳмон дар ҷодаи эҷоди шеъри кӯдакона пешсаф буда, ҳамчун ҳаҷвнигори бомаҳорат низ азизи хонандагон аст.
Асарҳои Абдусаттор Раҳмон «Бибию бобои ман», «Тағо ҷиян шуд», «Шакаррез» ва «Меҳрпайванд» аз тариқи нашриёти «Адиб» нашр шудаанд. Алҳол дар шаҳри Ваҳдат 10 нафар аъзои Иттифоқи нависандагони Тоҷикистон бо сарварии шоири шинохта Мирзо Файзалӣ фаъолияти пурсамар доранд.