Ба Кодекси андози кишвар илова ворид мешавад

Душанбе, 26.01.2016.(АМИТ „Ховар“).- Интизор меравад, ки вакилони палатаи поёнии Парлумони мамлакат ба лоиҳаи Қонуни Ҷумҳурии Тоҷикистон «Дар бораи Агентии назорати давлатии молиявӣ ва мубориза бо коррупсияи Ҷумҳурии Тоҷикистон» илова ворид намоянд. Масъалаи мазкур дар ҷаласаи Шӯрои Маҷлиси намояндагон таҳти раёсати Шукурҷон Зуҳуров дар Душанбе баррасӣ шуд. Дар ҷаласаи Шӯро ҳамзамон лоиҳаи қонунҳои Ҷумҳурии Тоҷикистон «Дар бораи сармоягузорӣ», „Дар бораи таҳсилоти калонсолон“, «Оид ба ворид намудани илова ба Қонуни Ҷумҳурии Тоҷикистон «Дар бораи мақомоти амнияти миллии Ҷумҳурии Тоҷикистон», „Дар бораи системаи иҷрои ҷазои ҷиноятӣ», „Дар бораи маориф“, «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи роҳҳои автомобилгард ва фаъолияти роҳдорӣ“, «Дар бораи тайёрии варзишӣ», «Оид ба ворид намудани иловаҳо ба Қонуни Ҷумҳурии Тоҷикистон «Дар бораи масъулияти падару модар дар таълиму тарбияи фарзанд», «Дар бораи ворид намудани илова ба Кодекси андози Ҷумҳурии Тоҷикистон» матраҳ гардиданд.
Аъзои Шӯро инчунин Созишнома байни Ҳукумати Ҷумҳурии Тоҷикистон ва Ташкилоти озуқаворӣ ва кишоварзии Созмони Милали Муттаҳид оид ба «Лоиҳаи беҳсозии тарзи идоракунии мубориза бар зидди малах»-ро баррасӣ карданд.