Бардошт аз Паём: Курсҳои омўзиши забони русӣ таъсис дода мешаванд

Душанбе, 22.01.2016. (АМИТ «Ховар») — Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон дар Паёми навбатӣ ба Маҷлиси Олӣ изҳор дошт, ки:
«Масъулини муассисаҳои таҳсилоти ибтидоӣ ва миёнаи касбиро зарур аст, ки бо истифода аз тамоми захираву имкониятҳо барои фароҳам овардани ҷойҳои нави корӣ чораҷӯӣ намуда, барои таъсиси курсҳои таълими касбу ҳунар ва забономўзии муҳоҷирони меҳнатӣ тадбирҳои иловагӣ андешанд».
Вобаста ба ин мудири шуъбаи маорифи Мақомоти иҷроияи ҳокимияти давлатии ноҳияи Восеъ Сироҷиддин Гурезов андешаҳояшро дар мавриди ҷонибдорӣ аз Паёми Пешвои миллат баён намуда, аз ҷумла гуфт, ки:-Шуъбаи маорифи Мақомоти иҷроияи ҳокимияти давлатии ноҳияи Восеъ дар асоси дастури Пешвои миллат ва татбиқи «Барномаи давлатии такмили таълим ва омўзиши забонҳои русӣ ва англисӣ дар Ҷумҳурии Тоҷикистон барои солҳои 2015-2020» тасмим гирифтааст, ки дар назди муассисаҳои таълимӣ курсҳои ройгони омўзиши забони русиро барои забономўзии муҳоҷирони меҳнатӣ ба роҳ монад.
Ҳоло дар муассисаҳои таълимии ноҳия 194 омўзгори фанни забони русӣ фаъолият доранд, ки аз онҳо 176 нафар мутахассисони ихтисосманди фанни забони русӣ буда, дорои маълумоти олӣ ва 18 нафар дорои таҳсилоти миёнаи махсуси омўзгорӣ мебошанд.
Норасоии кадрии омўзгорӣ аз фанни забони русӣ дар муассисаҳои таълимии ноҳия дида намешавад.