Дар Ҷопон куҳансолтарин марди сайёра дар синни 112 аз олам даргузашт
![](https://khovar.tj/wp-content/uploads/2016/01/112.jpg)
Душанбе, 19.01.2016. (АМИТ «Ховар»). — Рӯзи сешанбе дар Ҷопон куҳансолтарини сокини сайёра Ясутаро Коидэ дар синни 112 аз олам даргузашт. Дар ин бора намояндагони беморхонаи шаҳри Нагоя, ки номбурда дар он муолиҷа мешуд, хабар доданд.
Сабаби фавти мавсуф бемории дил будааст. Ин марди дарозумр 13 марти соли 1903 дар шаҳри Суругаи музофоти Фукуи таваллуд шуда буд. Вай дар 107 солагиаш ба шаҳри Нагоя омад. То рӯзи вафоташ ягон дардеро ҳис намекард ва навиштаҳоро беайнак мехонд. Коидэ моҳи августи соли гузашта, ки дар он вақт ҳамдиёраш Сакари Момои дар синни 112 вафот карда буд, расман марди куҳансолтарини сайёра дониста шуд.
Сокинони Ҷопон аз нигоҳи дарозумрӣ дар ҷаҳон яке аз мақоми баландтаринро касб намудаанд. Ин нишондод барои мардон 80,5 сол ва барои занон 86,83 солро ташкил медиҳад. Мувофиқи маълумоти омор, соли гузашта теъдоди сокинони синнашон беш аз 80 — солаи Ҷопон бори нахуст дар таърихи миллат беш аз 10 миллион нафарро ташкил дод. Дар Ҷопон сокинони синнашон аз 65 боло 34,8 миллион нафарро ташкил дода, 26,7 фоизи тамоми аҳолии Ҷопон ба онҳо рост меояд, ки он дар тамоми таърихи кишвар рекорд ба шумор меравад. Мувофиқи арзёбии мутахассисон, дар сурати давом ёфтани тамоюли ҳозира то соли 2040 барои сокинони синнашон аз 65 боло беш аз 36 фоизи аҳолии кишварро ташкил хоҳанд кард.