Ҷ. Давлатов: 22,5 фоизи теъдоди хизматчиёни давлатиро занон ташкил медиҳанд

Душанбе, 12.01.2016. (АМИТ «Ховар»). — “То 1 октябри соли 2015 дар мақомоти марказӣ, маҳаллӣ ва худидоракунии шаҳрак ва деҳот теъдоди хизматчиёни давлатӣ 18 ҳазору 704 нафар буда, аз ин шумора 4 ҳазору 214 нафар ё 22,5 фоизро занон ва 8 ҳазору 49 нафар ё 43,0 фоизро ҷавонони то 35- сола ташкил медиҳанд”,-гуфт директори Агентии хизмати давлатии назди Президенти ҶТ Ҷумъа Давлатов имрӯз, 12 январ зимни нишасти матбуотӣ.
Бино ба маълумоти агентӣ, дар қиёс ба ҳамин давраи соли гузашта теъдоди ҷавонон дар хизмати давлатӣ 283 нафар афзудааст.
“Ҳоло 5 ҳазору 632 нафар хизматчиёни давлатӣ дар мансабҳои роҳбарикунанда фаъолият дошта, аз ин шумора 1 ҳазору 51 нафар ё 18,6 фоиз занон ва 1 ҳазору 313 нафар ё 23,3 фоиз ҷавонони то 35 — сола мебошанд. Шумораи занон дар ҳайати роҳбарикунандаи хизмати давлатӣ дар қиёс ба ҳамин давраи соли гузашта 23 нафар ё 0,1 фоиз, теъдоди ҷавонон 136 нафар ё 2,1 фоиз зиёд гардидааст”,-илова намуд директори агентӣ.