ДМИТ: Имкониятҳои нави истифодаи технологияҳои инноватсионӣ

Душанбе,12.01.2016.(АМИТ «Ховар»).- Дар Донишкадаи молия ва иқтисоди Тоҷикистон маҳфили навбатии илмӣ-амалии «Коршиноси иқтисодӣ» доир гардид.
Тавре ки котиби матбуоти донишкада Машҳура Абдуллоева хабар дод, дар маҳфил масъалаҳои назария ва амалияи равандҳои бозомӯзии технологияҳои инноватсионӣ, заминаҳои мафкуравии илмию омӯзишӣ, роҳҳои бартараф кардани мушкилиҳои тараққиёт ва дарёфти роҳҳои пурсамари шабакаҳои мобилӣ, технологияҳои инноватсионӣ ва истифода бурдани таҷрибаи мамлакатҳои пешқадам дар ин самт пешниҳод гардонида шуд.
Бо ҳамин мақсад дар маҳфил таҳти унвони «Таҷрибаи идоракунии технологияҳои муосири Ҳиндустон ва истифодаи он дар шароити Ҷумҳурии Тоҷикистон» маърӯзаҳои сардори Маркази технологияҳои инноватсионии таълимӣ ва иттилоотӣ А.Наҷмиддинов ва мутахассиси марказ С.Мараҷабов, ки дар сафари хидматӣ дар Ҳиндустон қарор доштанд, шунида шуданд.
А. Наҷмиддинов иброз дошт, ки асоси ташаккул додани рушди шабакаҳои технологияҳои инноватсионии Ҳиндустон- ин мутобиқшавӣ ба моделҳои нави шабакаҳои мобилӣ ва вобастакунии имкониятҳои таъмингардонии идоракунии марҳилавии онҳо дар хизматрасонӣ бо механизм ва фишангҳои миллиашон мебошад.
С.Мараҷабов бо назардошти вазъи бозомӯзии навигариҳои технологӣ зикр намуд, ки ин гуна вазъият низ ҷиҳатҳои омӯзиширо дорост. Дар ҷараёни сафарбарнамоии вазифаҳои технологияҳои мобилии Ҳиндустон ба назар мерасад, ки дар рушди инноватсионӣ муносибати ҷиддӣ зоҳир менамоянд. Сари ҳар қадам аз тарафи онҳо риояи баланди самаранокӣ ба назар мерасад. Дар ҳамин асос баланд бардоштани мақоми технологияҳои муосир ва пеш гирифтани роҳҳои мукаммалгардонидашуда ба роҳ монда шудааст.
Дар маҳфил ҳалли мушкилоти ҷойдоштаи рушди технологияҳои инноватсионии кишвар бо дараҷаи сифатан нави пеш гирифтани дараҷаи бозсозиҳо ва омӯзиши онҳо дар сатҳи байналхалқӣ баррасӣ гардид.