Ошкор гардидани ҷиноятҳои дуздӣ

Душанбе, 12.01.2016. (АМИТ «Ховар»). — Шаби 28 ба 29-уми декабри соли 2015, шахсони номаълум бо роҳи пинҳонӣ вориди мағозаи соҳибкор, сокини 23-солаи шаҳри Конибодом шуда, аз он ҷо якчанд намуд телефонҳои мобилии гуногунтамға, ҷамъ ба маблағи 10645 сомониро дуздида, аз ҷойи ҳодиса ғайб задаанд. Дар натиҷаи гузаронидани чорабиниҳои фаврӣ-ҷустуҷӯӣ рӯзи 11 январ, бо гумони содир намудани ҷинояти дуздии мазкур ду навраси 16-солаи сокинони Конибодом, хонандагони мактаби таҳсилоти умумӣ дастгир гардиданд.
Ҳамчунин дар ин рӯз кормандони милитсия тавонистанд як ҷинояти дуздии дигарро ошкор намоянд. Шаби 23 ба 24-уми ноябри соли 2015, шахсони номаълум бо роҳи пинҳонӣ вориди ҶДММ “Софтлаб”, воқеъ дар шаҳри Душанбе шуда, аз дохили сандуқи оҳанин (сейф)-и коргоҳ маблағи пулӣ; 1850 доллари амрикоӣ, 6000 сомонӣ ва ҷавоҳироти тиллоӣ, ҷамъ ба маблағи 247000-сомониро дуздида, аз ҷойи ҳодиса ғайб задаанд. Зимни гузаронидани чорабиниҳои фаврӣ-ҷустуҷӯӣ дар гумонбарӣ ба ҷинояти дуздӣ ду сокини 23-солаи шаҳри Душанбе дастгир шуданд.
Нисбат ба ҳодисаҳои мазкур парвандаи ҷиноятӣ оғоз гардида, тафтиш идома дорад.