Садамаҳои нохуши нақлиётӣ дар пойтахти кишвар

Душанбе, 21.01.2016. (АМИТ «Ховар») — 17-уми январи соли равон ронандаи мошини тамғаи «Опел-зефира» ҳангоми ҳаракат аз кӯчаи Б. Ғафуров, тавассути кӯчаи Н. Махсум ҷониби кӯчаи А. Ғуломови пойтахт дар рӯ ба рӯи бинои истиқоматии №36 бехатарии ҳаракат дар роҳро риоя накарда, пиёдагард Азизов Ҳотамшо, сокини 51-солаи шаҳри Кӯлобро зада, аз ҷои ҳодиса фирор кардааст. Бо кумаки шаҳрвандон Ҳотамшо Азизов ба беморхона расонида шуда, ронанда пас аз гузашти чор соати ҳодиса ба ШБДА РВКД шаҳри Душанбе барои тафтишот ҳозир карда шуд.
20-уми январ ронандаи мошини тамғаи «Хундай» (ёрии тиббии таъҷилӣ), рақами қайди давлатиаш 762 ХС 01, Турсунов Ҳабибулло Маҳмадуллоевич, соли таваллудаш 1958, сокини шаҳри Душанбе, ҳангоми ҳаракат дар кӯчаи Рӯдакӣ ба самти кӯчаи И. Сомонӣ ба аломати роҳ эътибор надода, ҳаракати худро идома додааст. Дар натиҷа мошини тамғаи «БМВ-745», рақами қайди давлатиаш 0777 ВР 07, ронандааш Сатторзода Аъзам Ҷамшед, соли таваллудаш 1992, ки аз кӯчаи Рӯдакӣ бо суръати баланд ҳаракат мекард, ба мошини ёрии таъҷилӣ бархурдааст.
Дар натиҷаи бархурди ду мошин кормандони беморхонаи ёрии таъҷилӣ: Турдиев Аъзам, соли таваллудаш 1976, Самиева Зебӣ, соли таваллудаш 1971 ва ронандаи мошини тамғаи «БМВ» Ҳабибулло Турсунов ҷароҳатҳои вазнини ҷисмонӣ бардошта, дар шуъбаи эҳёгарии беморхонаи Марказии миллии тиббии Тоҷикистон бистарӣ шудаанд.