Соли 2015 дар ҷумҳурӣ корҳои сохтмонию васлгарӣ ба маблағи беш аз 7 миллиард сомонӣ иҷро шуданд

Душанбе, 21.01.2016. (АМИТ «Ховар»). — Соли 2015 дар соҳаи сохтмону меъморӣ аз ҳисоби ҳамаи манбаъҳои маблағгузорӣ 9 миллиарду 77 миллион сомонӣ мавриди истифода қарор гирифт. Ҳамзамон ҳаҷми корҳои сохтмонию васлгарӣ 7 миллиарду 935 миллион сомониро ташкил дод. Муовини якуми раиси Кумитаи меъморӣ ва сохтмони назди Ҳукумати ҶТ Нуралӣ Сайидзода дар ҷараёни нишасти матбуотӣ, ки имрӯз дар шаҳри Душанбе баргузор гардид, дар ин бора хабар дод.
Ба гуфтаи мавсуф, ҳаҷми корҳои иҷрошуда дар институтҳои лоиҳакашию иктишофӣ ва тадқиқотии кумита нисбат ба соли 2014 баробари 4,8 фоиз афзуда, 28 миллион сомониро ташкил дод.
Қобили зикр аст, ки дар давраи ҳисобот беш аз як миллион метри мураббаъ манзил, макотиби таҳсилоти умумӣ барои 10 ҳазору 941 хонанда, дармонгоҳҳо барои қабули 661 мизоҷ, беморхонаи дорои 115 кат ва муассисаи томактабӣ барои 385 кӯдак мавриди истифода қарор гирифтанд.