Т. Каримзода: Хадамот барои ҷустуҷўи бозори иловагии меҳнат тадбирҳои зарурӣ меандешад

Душанбе, 16.01.2016. (АМИТ «Ховар»). — “Корҳои фаҳмондадиҳӣ дар байни муҳоҷирони меҳнатӣ, шаҳрвандони мамлакат оид ба тағйиру иловаҳо дар қонунгузории Федералии Русия дар самти муҳоҷирати меҳнатӣ бояд пурзўр карда шаванд”,-гуфт муовини вазири меҳнат, муҳоҷират ва шуғли аҳолии Ҷумҳурии Тоҷикистон Абдусалом Мирзоев дар маҷлиси ҳайати мушовараи Хадамоти муҳоҷират, имрӯз 15 январи соли равон. Абдусалом Мирзоев зикр намуд, ки дар ҳалли шумораи аниқи шаҳрвандон, ки ба хориҷи кишвар сафар мекунанд, корҳо бояд ҷоннок карда шаванд.
Сардори Хадамоти муҳоҷират Тоҳир Каримзода изҳор намуд, ки Хадамоти муҳоҷират новобаста аз душвориҳои ҷойдошта, бо мақсади танзими раванди муҳоҷират, ҷустуҷўи бозори иловагии меҳнат, баланд бардоштани сатҳи касбомўзӣ, забономўзии муҳоҷирони меҳнатӣ, омўзиши тағйирот дар қонунгузории Федератсияи Русия оид ба будубоши муҳоҷирони меҳнатӣ дар ин кишвар, вусъати равобит бо ҷамъиятҳо, ҳамватанони бурунмарзӣ ва ҷалби онҳо ба рушди иқтисодиёти мамлакат корҳои ташкилӣ, иттилоотию фаҳмондадиҳиро вусъат дода, назорати риояи қонунгузории миллиро аз ҷониби муҳоҷирони меҳнатии хориҷӣ ба роҳ монда, барои танзими масъалаҳои муҳоҷират чораҳои амалӣ ба сомон мерасонад.