«Тоҷикстандарт»: Дарёфти 16150 кг маҳсулоти сохтмонӣ бо тамғаи қалбакии “Алинекс”

Душанбе, 15.01.2016. (АМИТ «Ховар»).- “Дар заминаи таъмини ҳимояи ҳуқуқи истеъмолкунандагон аз тарафи нозирон якҷоя бо намояндагони ширкатҳое, ки тамғаи молии ҳимоятшудаи онҳо дар бозори истеъмолӣ аз тарафи дигар соҳибкорон истифода шудааст, санҷишҳо амалӣ гузаронида шуданд. Аз ҷумла, бо намояндагони ҶДММ “Фавр” ва ҶДММ “Барх” ва дар алоҳидагӣ дар натиҷаи санҷиш 16150 кг маҳсулоти сохтмонӣ бо тамғаи қалбакии “Алинекс” дарёфт ва аз муомилот гирифта шуданд. Тибқи тартиби муқарраргардида нисбат ба соҳибкороне, ки ба қонуншиканӣ роҳ додаанд, дар 7 ҳолат парвандаҳои ҳуқуқвайронкунии маъмурӣ оғоз шуда, ҷазои маъмурӣ таъйин шуд”,- иброз намуд директори Агентии «Тоҷикстандарт» Ибодулло Қурбониён имрӯз зимни нишасти матбуотии ин ниҳод.
Ҳамчунин ба иттилои И. Қурбониён бо дархости ҶДММ “Сардор-2008”, ки ба истеҳсоли донаҳои офтопараст бо тамғаи “Симба” машғул мебошад, аз бозори истеъмолӣ маҳсулоти қалбакии корхонаи мазкур ошкор ва аз муомилот гирифта шуд.