Чорабинии варзишӣ бахшида ба таъсисёбии Қувваҳои Мусаллаҳ

Душанбе, 22.02.2016 (АМИТ «Ховар»).- Ба муносибати 23-юмин солгарди таъсисёбии Қувваҳои Мусаллаҳи Ҷумҳурии Тоҷикистон 20-уми феврал бо ибтикори Вазорати мудофиа дар толори варзишии Кумитаи андоз байни рӯзноманигорони васоити ахбори омма ва низомиён аз рӯи 4 намуди варзиш, аз қабили футболи хурд, дастхобонӣ, варзиши сабук ва бандкашӣ мусобиқа доир гардид.
Дар мусобиқа дастаи рӯзноманигорон бо либосҳои сурх ва дастаи низомиён бо либосҳои кабуд вориди сабқат шуданд. Дастаи низомиён дастаи рӯзноманигоронро аз намуди футболи хурд бо ҳисоби калони 6:1 шикаст дод, аз намуди варзиши дастхобонӣ бошад, дастаи рӯзноманигорон сазовори ҷойи аввал гардид. Аз намудҳои бандкашӣ ва варзиши сабук бошад, дастаи низомиён сазовори ҷойи аввал ва дастаи рӯзноманигорон сазовори мақоми дуюм гардиданд. Дар охир ҳарду даста бо туфаҳои Вазорати мудофиа қадрдонӣ шуданд.