ДМТ: «Нишастҳои матбуотӣ- муаммо ва пешомадҳо»

Душанбе, 19.02.2016. (АМИТ «Ховар»). — «Мушоҳида мешавад, ки вақтҳои охир дар нишастҳои матбуотӣ роҳбарони аввал иштирок намекунанд. Бархе роҳбарон вақти зиёдро ба хондани варақаи иттилоотӣ сарф мекунанд. Ин ҳолат фурсати суол додани рӯзноманигоронро аз байн мебарад, ки ин ба манфиати кор нахоҳад буд»,-зикр дошт раиси Иттиҳоди журналистони Тоҷикистон Зинатулло Исмоилзода зимни мизи мудавваре, ки таҳти унвони «Нишастҳои матбуотӣ: муаммо ва пешомадҳо» дар факултети журналистикаи ДМТ бо иштироки устодони факултети рӯзноманигорӣ ва донишҷӯён баргузор гардид.
Сангин Гулов, мудири кафедраи журналистикаи байналхалқии факултети журналистикаи ДМТ зикр дошт, ки нишастҳои матбуотие, ки имрӯз дар ҶТ бо амри Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон сурат мегиранд, пеш ҳама, бозгӯи нақши расонаҳо дар фазои иттилоотии Тоҷикистон ҳастанд. Яъне, онҳо бояд боло рафтани нақши ВАО-ро нишон диҳанд. Аз тарафи дигар тавассути нишастҳои матбуотӣ хабарнигорон бо иттилои дуруст ва расмӣ аз забони шахсони аввал таъмин мегарданд, ки эътимоди ҷомеаро ба ВАО мустаҳкам месозад.
Инчунин Ҷовид Муқим, устоди факултети журналистика дар бастагӣ ба нишастҳои матбуотӣ чунин пешниҳодҳо кард:
1) Нишастҳои матбуотӣ мисли пештара дар 3 моҳ як маротиба гузаронида шаванд;
2) Иштироки роҳбари аввал бояд ҳатмӣ бошад;
3) Варақаҳои матбуотӣ бояд пештар ба журналистон пешниҳод шаванд.
4) Роҳбарон дар нишасти матбуотӣ ҳисоботашонро нахонда, танҳо ба суолҳои хабарнигорон посух гӯянд.
5) Иштирок барои журналистони ҳам давлатӣ ва ҳам хусусӣ бояд озод бошад.
Ёдовар мешавем, ки имрӯз дар факултети журналистикаи ДМТ бо иштироки устодон, рӯзноманигорон ва донишҷӯён мизи мудаввар дар мавзӯи «Нишастҳои матбуотӣ; муаммо ва пешомадҳо» баргузор гардид, ки дар он ҳозирин эрод ва пешниҳодҳои худро вобаста ба мавзӯи мазкур иброз доштанд.