Муродзода Дустмурод: «Соли 2015 барои вайрон кардани қонун зимни баррасии парвандаҳо 2 нафар судя аз кор озод гардид»

Душанбе,1.02.2016. (АМИТ «Ховар»).-«Соли 2015 барои вайрон кардани қонун зимни баррасии парвандаҳо ё барои содир намудани рафторе, ки ба қадру номуси судя доғ мерасонад, 2 нафар судя аз вазифаш сабукдӯш гардид»,- иброз намуд раиси Шӯрои адлияи Ҷумҳурии Тоҷикистон Муродзода Дустмурод Ҳайит имрӯз зимни нишасти матбуотӣ ба хабарнигорон.
Ба гуфтаи Муродзода Дустмурод дар ин давра аз шумораи умумии кормандони дастгоҳҳои судҳои ҷумҳурӣ 92 нафар бо хоҳиши худ ва 44 нафар бинобар сабаби ба кори дигар гузаштан аз вазифаҳо озод гардида, барои содир намудани омилҳои коррупсионӣ 4 нафар ба ҷавобгарии ҷиноятӣ кашида, аз мансаби ишғолнамуда озод шудаанд.
«Ҳамзамон барои меҳнати софдилона ва хизматҳои шоён тибқи Фармони Президенти Ҷумҳурии Тоҷикистон 3 нафар раисону судяҳои ҷумҳурӣ бо мукофоти давлатӣ сарфароз гардиданд»,-илова намуд раиси Шӯрои адлия.