Н. Ҳикматуллозода: «Оид ба ҷилавгирии таъсири хавфҳои эҳтимолӣ ба иқтисоди миллӣ тадбирҳои саривақтӣ андешида шуданд»

Душанбе, 04.02.2016. (АМИТ «Ховар»).- «Маҷмӯи маҳсулоти дохилии кишвар дар соли 2015 ба 48,4 миллиард сомонӣ, рушди воқеии он ба 6 фоиз баробар гардид»,-гуфт имрӯз дар ҷамъи хабарнигорон Неъматулло Ҳикматуллозода -вазири рушди иқтисод ва савдои ҷумҳурӣ.
Вазир доир ба фаъолияти Вазорати рушди иқтисод ва савдо ва натиҷаҳои рушди иҷтимоию иқтисодии кишвар дар соли гузашта гузориш дода, зикр кард, ки рушди мусбати иқтисоди ҷумҳурӣ аз ҳисоби зиёд гардидани ҳаҷми маблағгузориҳо ба сармояи асосӣ 21,2 фоиз, маҳсулоти саноатӣ 11,2 фоиз, гардиши савдои чакана 5,5 фоиз, маҳсулоти кишоварзӣ 3,2 фоиз ва боркашонию мусофиркашонӣ 2,1 фоизӣ таъмин карда шуд. Таъкид гардид, ки ҳиссаи истеҳсоли молҳо дар сохтори маҷмӯи маҳсулоти дохилӣ 46,5 фоиз, ҳиссаи хизматрасониҳо беш аз 41 фоиз ва ҳиссаи андозҳо зиёда аз 2 фоизро ташкил дод.
Неъматулло Ҳикматуллозода инчунин доир ба ҷилавгирии таъсири хавфҳои эҳтимолӣ ба иқтисоди миллӣ дар шароити бӯҳрони молиявӣ ибрози назар карда, гуфт, ки бо ин мақсад аз аввали соли 2015 бо ибтикори Ҳукумати ҷумҳурӣ гурӯҳи кории доимоамалкунандаи дузинагӣ созмон дода шуд, ки зинаи дуюми он дар Вазорати рушди иқтисод ва савдои кишвар фаъолият дорад. Дар доираи фаъолияти гурӯҳҳои кории мазкур аз ҷониби Вазорати рушди иқтисод ва савдои кишвар лоиҳаи Қарори Ҳукумати Ҷумҳурии Тоҷикистон «Дар бораи нақшаи чорабиниҳо оид ба пешгирии таъсири хавфҳои эҳтимолӣ ба иқтисодиёти миллӣ» таҳия гардида, он бо қарории Хукумати мамлакат тасдиқ карда шудааст. Аз ҷониби зинаи дуюми гурӯҳи корӣ дар ин давра ба ҳукумати кишвар доир ба ҷараёни иҷрои тадбирҳои нақша ва маводи таҳлилӣ роҷеъ ба вазъи бахшҳои иқтисоди миллӣ маълумот ироа гардидааст.