Парлумони Тоҷикистон созишномаи ТРАСЕКА-ро ба тасвиб расонд
Душанбе, 16.02.2016.(АМИТ «Ховар»).- Созишнома оид ба маблағгузории муштараки котиботи доимии Комиссияи байниҳукуматии ТРАСЕКА (КД КБҲ ТРАСЕКА) байни ҳукуматҳои тарафҳои Созишномаи асосии бисёрҷониба оид ба нақлиёти байналмилалӣ барои рушди долони Аврупо-Қафқоз -Осиёро вакилони палатаи поёнии Парлумони Тоҷикистон ба тасвиб расониданд.
Шералӣ Ганҷалзода -вазири нақлиёти кишвар зимни тавзеҳи ин санад гуфт, ки Созишнома аз ҷониби Ҳукумати Ҷумҳурии Тоҷикистон 21 апрели соли 2005 дар Боку -пойтахти Озарбойҷон ба имзо расонида шуда, он асосан барои нигоҳдории котиботи доимии ТРАСЕКА равона шудааст. Мутобиқи банди 4 -и Созишнома, ҳаҷми ҳаққи узвияти байни кишварҳои аъзо баробар муайян шуда, ҳамасола бояд ба котиботи доимӣ то 31 декабри соли фаъол ва на дертар аз 31 марти соли оянда интиқол дода шавад. Алҳол ҳаҷми аъзоҳақии Тоҷикистон 60 ҳазор евроро ташкил медиҳад, афзуд вазир. Инчунин қарзи Ҷумҳурии Тоҷикистон дар назди барномаи мазкур, ки барои солҳои 2007-2015 қисман пардохт нашудааст, беш аз 50 ҳазор евро аст.
Ҳамзамон вазир роҷеъ ба барномаи ТРАСЕКА -долони нақлиётии Аврупо-Қафқоз Осиё маълумот дода гуфт, ки барномаи мазкур бо ташаббуси кишварҳои Арманистон, Озарбойҷон, Қазоқистон, Қирғизистон, Тоҷикистон, Туркманистон ва Узбекистон соли 1993 дар ҷаласаи вазирон дар Белгия таъсис дода шуда, дар асоси Созишномаи асосии бисёрҷониба оид ба нақлиёти байналмилалӣ барои рушди долони Аврупо -Қафқоз-Осиё, ки 8 сентябри соли 1998 дар Озарбойҷон ба имзо расидааст, фаъолият дорад.
Пайваст намудани шабакаи роҳҳои нақлиётии Аврупо-Қафқоз-Осиё ва истифодаи самараноки иқтидори транзитии кишварҳои аъзо барои сабукгардонии раванди интиқоли байналмилалии борҳо, ки ҷавобгӯи ҳадафҳои стратегии кишварамон маҳсуб мешавад, аз ҳадафҳои асосии ин барнома аст. Алҳол 13 кишвари ҷаҳон аъзои ин барнома буда, барои муайян кардани самти фаъолият соли 2003 Комиссияи байниҳукуматӣ созмон дода шудааст. Мақомоти иҷроияи Комиссияи мазкур котиботи доимии ТРАСЕКА мебошад, ки дар шаҳри Боку воқеъ аст. Ин барнома аз ҷониби котиби генералӣ идора шуда, фаъолият ва самти ояндаи он аз ҷониби раиси комиссияи байниҳукуматӣ, ки аз ҳисоби раисони миллии комиссия аз рӯи тартиби алифбо таъйин мешаванд, амалӣ мегардад. Чумҳурии Тоҷикистонро дар ин барнома ва комиссия муовини аввали сарвазири кишвар Давлаталӣ Саид ба ҳайси раиси миллии котиботи ТРАСЕКА ва Солеҳ Муъминзода ба ҳайси котиби миллӣ намояндагӣ менамоянд. Маблағгузории лоиҳаҳо дар доираи барномаи мазкур аз ҷониби Комиссияи Аврупо таъмин карда мешавад.
Шералӣ Ганҷалзода бо дахли манфиатҳои кишварамон аз узвият дар доираи барнома ва комиссияи мазкур ибрози назар карда гуфт, ки манфиати Ҷумҳурии Тоҷикистон аз узвият дар доираи барнома ва комиссия иштирок дар татбиқи кумакҳои техникӣ мебошад, ки ба омӯзиши кадрҳо ва рушди нақлиёти автомобилӣ, авиатсияи гражданӣ ва таъмини бехатарии ҳаракат дар роҳҳо нигаронида шудааст, зеро то ҷое мусаллам аст, ҳамасола дар доираи барномаи ТРАСЕКА курсҳои бозомӯзӣ барои мутахассисони соҳаи нақлиёти автомобилӣ, авиатсияи гражданӣ, логистика ва бехатарии нақлиёти рӯизаминӣ дар давлатҳои аъзои ТРАСЕКА ташкил мешавад, ки дар он мутахассисони Вазорати нақлиёт, Вазорати корҳои дохилӣ, Хадамоти гумрук ва дигар мақомоти марбутаи кишварамон иштирок менамоянд. Вазири нақлиёти кишвар таъкид кард, ки танҳо соли гузашта 15 нафар кормандони соҳа дар 7 чорабинии барномаи мазкур иштирок намуданд, ки хароҷоти иштирок пурра аз ҳисоби барнома пардохт шудааст. Инчунин шурӯъ аз соли 2016 дар ҳамкорӣ бо созмонҳои бехатарии авиатсионӣ лоиҳаи кумак ба бахши авиатсияи гражданӣ дар ҳаҷми умумии 5 миллион евро амалӣ гардонида мешавад, ки он барои мутобиқгардонии қонунгузории ҷории Ҷумҳурии Тоҷикистон ба меъёрҳои байналмилалӣ ва кумаки машваратию техникӣ равона шудааст. Тасдиқи созишномаи мазкур аз сӯи Парлумони мамлакат барои рушди соҳаи нақлиёти кишвар тавассути татбиқи лоиҳаи нави инвеститсионӣ ва ҷалби бештари сармояи хориҷӣ муҳим арзёбӣ мегардад.








Ҷаласаи навбатии Шурои Маҷлиси намояндагони Маҷлиси Олии Ҷумҳурии Тоҷикистон, даъвати ҳафтум баргузор гардид
Эҳтиром ба Рӯзи Президент эҳтиром ба давлат, миллат, Истиқлолияти давлатӣ ва сулҳу ваҳдат аст
Китоби «Президент ва ниҳоди президентӣ дар Ҷумҳурии Тоҷикистон» рӯнамоӣ гардид
Дар Маҷлиси намояндагон бахшида ба Рӯзи Президенти Тоҷикистон ҳамоиш баргузор гардид
ДАР МЕҲВАРИ СУЛҲ, ВАҲДАТ ВА СОЗАНДАГӢ. Мулоҳизаҳо оид ба рисолати таърихии Пешвои миллат муҳтарам Эмомалӣ Раҳмон
Раиси Маҷлиси намояндагон бо Сафири Беларус дар Тоҷикистон вохӯрӣ намуд
Дар иҷлосияи Маҷлиси намояндагон ба якчанд қонун тағйиру иловаҳо ворид гардид
Ҷаласаи навбатии Шурои Маҷлиси намояндагони Маҷлиси Олии Ҷумҳурии Тоҷикистон, даъвати ҳафтум баргузор гардид
Файзалӣ Идизода бо Аҳмад бин Муҳаммад Ал-Ҷарвон ба таври маҷозӣ вохӯрӣ намуд
Рустами Эмомалӣ аз шаҳри Тошканд ба шаҳри Бухоро ташриф оварданд
Ҷаласаи навбатии иҷлосияи сеюми Маҷлиси намояндагони Маҷлиси Олии Ҷумҳурии Тоҷикистон, даъвати ҳафтум баргузор шуд






