Прокурори генералӣ дар Парлумон ҳисобот медиҳад

Душанбе, 15.02.2016.(АМИТ «Ховар»).- Дар асоси қарори ба тасвибрасонидаи раиси Маҷлиси миллии Маҷлисии Олии Ҷумҳурии Тоҷикистон Маҳмадсаид Убайдуллоев 3 марти соли равон дар шаҳри Душанбе иҷлосияи панҷуми Маҷлиси миллии Маҷлиси Олии Ҷумҳурии Тоҷикистон даъвати панҷум доир мегардад.
Аз палатаи болоии Парлумони кишвар ба АМИТ «Ховар» иттилоъ доданд, ки дар иҷлосия Қонуни конститутсионии Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи Маҷлиси Олии Ҷумҳурии Тоҷикистон», Қонуни Ҷумҳурии Тоҷикистон «Дар бораи ворид намудани тағйиру иловаҳо ба Кодекси оилаи Ҷумҳурии Тоҷикистон», Қонуни Ҷумҳурии Тоҷикистон «Оид ба ворид намудани тағйиру иловаҳо ба Қонуни Ҷумҳурии Тоҷикистон «Дар бораи ваколатдор оид ба ҳуқуқи инсон дар Ҷумҳурии Тоҷикистон» баррасӣ ва ҷонибдорӣ хоҳанд гашт.
Ҳамзамон интизор меравад, ки дар иҷлосияи панҷуми Маҷлиси миллӣ номҳои баъзе аз шаҳру ноҳияҳои кишвар, ба мисли Қайроққум, Чкалов, Ғончӣ, Ҷалолиддини Румӣ, Ҷиликӯл, Қумсангир, Шӯрообод, Тавилдара ва Ҷиргатол тағйир дода шаванд.
Дар ҷараёни иҷлосияи панҷуми палатаи болоии Парлумони кишвар аъзои Маҷлиси миллӣ инчунин ҳисоботи Прокурори генералии Ҷумҳурии Тоҷикистон Юсуф Раҳмон «Дар бораи назорати риояи дақиқ ва иҷрои якхелаи қонунҳо дар қаламрави Ҷумҳурии Тоҷикистон дар соли 2015» -ро мешунаванд.