Сокинони Норак барои барафрохтани парчами гурӯҳи ДАИШ то 25 сол аз озодӣ маҳрум шуданд

Душанбе, 19.02.2016. (АМИТ «Ховар»).-13 нафаре, ки барои барафрохтани парчами гурӯҳи ДАИШ муттаҳам мешуданд, аз 10 то 25 сол аз озодӣ маҳрум шуданд.
Дар ин бора суди вилояти Хатлон 17-уми феврал ҳукми худро нисбат ба 13 тан аз сокинони шаҳри Норак эълон кард.
Тавре ки Сайфиддин Муҳиддинов, муовини раиси Суди вилояти Хатлон иттилоъ дод, бар зидди ин 13 нафар бар асоси банди 307-и Кодекси ҷиноии Тоҷикистон ва ду зербанди он — даъват ба сарнагун кардани сохти конститутсионӣ, даъват ба фаъолиятҳои тундгароёна ва моддаи 187 — таъсиси иттиҳодияҳои ҷиноӣ парванда боз шуда буд. Бар пояи ҳукми суд, нафарони судшаванда мутаносибан аз 10 то 25 сол аз озодӣ маҳрум шуданд.
Аксари онҳо мардҳои оиладор буда, ҷавонтаринашон 21 сол ва бузургтаринашон 74 сол дорад.