Қурғонтеппа: Вохӯрӣ дар «Кохи Ватан»

Душанбе, 22.02.2016 (АМИТ «Ховар»).-Дар толори «Кохи Ватан»-и шаҳри Қурғонтеппа вохӯрии сокинони шаҳр бо ҳайати Гурӯҳи корӣ — намояндагон аз Дастгоҳи иҷроияи Президенти Ҷумҳурии Тоҷикистон, Нуриддин Саид, вазири маориф ва илм ва З., Ализода ваколатдор оид ба ҳуқуқи инсон баргузор гардид. Баромадкунандагон ба ҳозирин муҳтавои Пайёми навбатии Асосгузори сулҳу ваҳдати миллӣ, Пешвои миллат, Президенти Ҷуҳурии Тоҷикистон, муҳтарам Эмомалӣ Раҳмонро ба Маҷлиси Олӣ ва тағйироту иловаҳоро ба Сарқонуни Ҷумҳурии Тоҷикистон, ки баргузории райъпурсӣ 22 майи соли ҷорӣ дар назар дошта шудааст, шарҳу эзоҳ дода, ҳамчунин ҷавононро ба илмомӯзӣ, аз худ кардани забонҳои хориҷӣ, аз қабили русиву англисӣ, омӯзиши амиқи технологияи муосир, мусаллаҳ будан бо илму дониши замонавӣ, ихтироъкорӣ ва дар маҷмӯъ ҳиссагузорӣ дар ободониву пешрафти мамлакат даъват намуданд. -Бо назардошти таҳаввулоти ҷаҳони имрӯза ва мушаххасоти геопалитикии он, дар рафти ҳимояи манфиатҳои ҳаётан муҳими миллӣ рӯ ба рӯи мушкилот ва вазифаҳои бузургтаре қарор дорем, ки ҳалли онҳо аз ҳар яки мо диди амиқи стратегӣ, иродаи матин, зиракии сиёсӣ ва амали ниҳоят санҷидаву масъулиятро талаб менамоянд,- таъкид намуданд ҳайати корӣ ба иштирокчиёни вохӯрӣ.