ВКХ: Тоҷикистон соли гузашта дар масири ҳифзи манфиатҳои миллӣ қадамҳои устувор гузошт

Душанбе, 04.02.2016 (АМИТ «Ховар») — «Соли гузашта Тоҷикистон дар асоси дастуру супоришҳои Пешвои миллат Эмомалӣ Раҳмон усули эълоншудаи «сиёсати дарҳои боз»-ро идома дода, дар масири ҳифзи манфиатҳои миллӣ, баланд бардоштани сатҳи равобит бо кишварҳо ва созмонҳои байналмилалӣ, афзоиши эътимоди дуҷониба, талош барои ҳалли бӯҳронҳои минтақавию ҷаҳонӣ, зиёд намудани теъдоди шарикони стратегӣ ва муносибатҳои неки ҳамсоядорӣ қадамҳои устувор гузошт»,-таъкид кард вазири корҳои хориҷӣ Сироҷиддин Аслов зимни нишасти матбуотии Вазорати корҳои хориҷии мамлакат, ки дар Душанбе бо ҳузури намояндагони корпуси дипломатии муқими Душанбе, созмонҳои байналмилалӣ ва хабарнигорони расонаҳои ватаниву хориҷӣ ҷараён дорад
Дар нишаст зикр гардид, ки соли гузашта ҷаҳони муосир шоҳиди густариши терроризму ифротгароӣ, ҷангу хунрезӣ, муқовиматҳои қавмию мазҳабӣ, зиддият миёни қудратҳои бузург, бӯҳронҳои иқтисодӣ, бад шудани вазъи ҳуқуқи башар дар минтақаҳои ноором, афзоиши қашшоқию бенавоӣ, вайроншавии иқлим ва монанди инҳо буд.