Вохӯрии гурӯҳи «Пешоҳанг» бо хонандагон

Душанбе, 17.02.2016. (АМИТ «Ховар»).- 16 феврал дар муассисаҳои таҳсилоти умумии рақами 37, 7, 16, 84 ва 76-и пойтахт гурӯҳи ҷавонони «Пешоҳанг» дар якҷоягӣ бо кормандони Хадамоти пешгирии ҳуқуқвайронкунӣ дар байни ҷавонону ноболиғони Вазорати корҳои дохилӣ доир ба муҳтавои Паёми Асосгузори сулҳу Ваҳдати миллӣ, Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, омӯхтани илму дониш, аз ҷумла фанҳои дақиқ, забонҳои хориҷӣ, технологияи муосир, пешгирӣ аз гаравидани ҷавонону ноболиғон ба ҳизбу ҳаракатҳои ифротгаро ва дигар мавзӯъҳои мубрами рӯз вохӯрӣ доир намуданд.
Зимни вохӯриҳо ҷавонони фаъоли гурӯҳи «Пешоҳанг» мактаббачагонро ба ватандӯстию ватанпарастӣ, арҷгузорӣ ба арзишҳои миллӣ ва дӯстию рафоқат даъват намуда, зикр намуданд, ки ин ҳама ободию осоиштагӣ ва пешравию тараққиёт маҳз бо саъю кӯшиши Пешвои миллати тоҷикон ба даст омада, насли наврас бояд бо омӯхтани илму маърифат дар рушду инкишофи минбаъдаи Ватани азизамон саҳмгузор бошанд.
Мавриди зикр аст, ки бо ташаббуси Вазорати корҳои дохилӣ аз ҳисоби гурӯҳи ҷавонони «Пешоҳанг» ва кормандони Хадамоти пешгирии ҳуқуқвайронкунӣ дар байни ҷавонону ноболиғони Вазорати корҳои дохилӣ гурӯҳи корӣ таъсис ёфта, шурӯъ аз 16 феврал тӯли 10 рӯз дар тамоми муассисаҳои таҳсилоти умумии шаҳри Душанбе бо мактаббачагон чунин вохӯриҳо гузаронида мешаванд.