Ҷашни Наврӯз дар Теҳрон

Душанбе, 16.03.2016. (АМИТ «Ховар»).- Дар оғози қудуми мубораки Наврӯз дар Сафорати Ҷумҳурии Тоҷикистон дар Теҳрон бахшида ба иди байналмилалии Наврӯз чорабинии фарҳангӣ бо ҳамватанон ва донишҷӯёни тоҷик бо шукӯҳу шаҳомати хосса баргузор гардид.
Сафири Ҷумҳурии Тоҷикистон дар Теҳрон Неъматулло Эмомзода дар робита ба таърихи Наврӯз ва таҷлили он дар Тоҷикистон сухан ронда, ҳамзамон аз иқдомҳои Ҳукумати Тоҷикистон ва мизбонии чандин ҷашни ҷаҳонии Наврӯз бо ширкати сарони кишварҳо ва мақомоти баландпояи давлатҳои ҳавзаи Наврӯз ва мизбонии Ҳамоиши байналмилалии адибони ҳавзаи Наврӯз таҳти унвони «Наврӯз дар адабу ҳунари ҷаҳон» сухан гуфт.
Дар фарҷоми чорабинии мазкур, рӯнамоии Тоҷикистон ва анъанаҳои наврӯзӣ ҳамроҳ бо наворҳои видеоӣ оид ба ҷашни Наврӯз дар Тоҷикистон ба намоиш гузошта шуд. Дар толор гӯшаи Тоҷикистон бо сабки хоси тоҷикона ороиш ёфта, дар он либос, асбобҳои мусиқӣ, намунаи ҳунарҳои дастии миллӣ ва маводи таблиғотӣ оид ба рушди иқтисодию иҷтимоии Тоҷикистон, таъриху фарҳанг, имкониятҳои сайёҳӣ ва дигар маводи ҷолиби диққат ба намоиш гузошта шуда буд.