Дарвоз: Таҷлили Иди Наврӯз дар Маркази бонувон

Хоруғ, 17.03.2016. (АМИТ «Ховар»).- Занону духтарони Маркази бонувони ноҳияи Дарвоз бо аҳли оилаашон ҷашни бостонии Наврӯзро бо тамоми расму суннатҳои хоси ин ноҳия истиқбол гирифтанд. Рохбари ин марказ Маърифат Неъматова гуфт, ки ҳар минтақаи кишвар хусусиятҳои хоси наврӯзии худро дошта, баъзеи он ҳифз шудаву баъзеи дигар дар ҳоли кашфу дуввумбора ба иҷро гузоштананд. Як қисми расму суннатҳо ба шумули либосу таом, таронаву рақсҳо ба таҳриру такмил ниёз доранд, зеро зиндагӣ мисли обҳои мусаффои кӯҳсорон ҳамеша дар ҳаракат аст.
Аз ин рӯ, ҳангоми таҳияи либосҳои миллӣ мутобиқ ба замони муосир аз унсурҳои аврупоӣ истифода шудааст, ки ин писанди хотири ҷавонон аст. Ҳамчунин сайёҳон низ ин навъи либосҳоро зуд харид мекунанд.
Зимни базми наврузӣ бештар аз 30 намуди либосҳои миллӣ-аз либосҳои кӯдакона то барои калонсолон ба намоиш гузошта шуд. Дар саҳни марказ намоиши таомҳои миллӣ низ баргузор шуд.
Бинои Маркази бонувон бо тарҳи хеле ҷолибу зебо дар соҳили рӯдхонаи Панҷ се сол қабл бо дастури Пешвои миллат мавриди баҳрабардорӣ қарор дода шуд. Ҳоло дар ин ҷо наздики 80 нафар духтарону бонувон машғули кор мебошанд.