“Ҷилваи ҳусн”- ифодагари зебоӣ ва тарғибкунандаи либоси миллӣ

Душанбе, 04.03.2016 (АМИТ «Ховар»). — Бо мақсади тарғиби либоси миллӣ, пайдо намудани истеъдодҳои нав, пешниҳоди намудҳои беҳтарини либос бо тарҳи наву замонавӣ, нигоҳ доштани анъанаҳои тарроҳии либосу ороишоти миллӣ, либосҳои тавсиявии толибилмон, базмӣ ва идона 3 март дар Донишкадаи соҳибкорӣ ва хизмати кишвар Фестивали ҷумҳуриявии “Ҷилваи ҳусн” баргузор гардид.
Ректори донишкада доктори илми иқтисод, профессор Қодирзода Диловар Баҳриддин зикр намуд, ки фестивали «Ҷилваи ҳусн» ба 25 — умин солгарди Истиқлолияти давлатии Ҷумҳурии Тоҷикистон бахшида шуда, он ифодагари зебоӣ ва тарғибкунандаи либосӣ миллӣ мебошад.
“Баргузории чунин фестивалҳо шаҳодат аз зиндагонии орому осуда, сулҳу субот ва ватандўстиву хештаншиносии мардуми тоҷик ва суннатҳои волои он мебошад. Орзуву омоли мардум на танҳо ба таври шифоҳӣ, бо хондани суруду таронаҳо, рубоиҳо, нақл, ривояту афсонаҳо, балки тавассути иҷрои амалҳои суннатӣ, расму ойин ва либоси миллӣ низ баён мегарданд”,-иброз дошт Қодирзода Диловар.
Дар идомаи суханронӣ номбурда ҳозиринро бо фарорасии Рўзи Модар ва фасли зебои сол — баҳори ҳуҷаста самимона муборакбод намуд.
Дар чорабинӣ либоси сокинони минтақаҳои гуногуни Тоҷикистон намоиш дода шуд. Иштирокдорони озмун ба ҷамъомадагон рақсу суруд ва таронаҳои миллиро пешниҳод намуданд.
Дар фестивал раиси бахши кор бо занон ва оилаи ноҳияи Фирдавсии пойтахт Зуҳро Қўзиева ва дотсенти Донишкадаи фарҳанг ва санъати Тоҷикистон ба номи М. Турсунзода Соро Раҳимова иштирок намуда, ба ҳунари гулдухтарони донишкада баҳои баланд доданд.