Қирғизҳо бо 20 бозингар ба Душанбе омаданд

Душанбе, 28.03.2016 (АМИТ «Ховар»).- Дастаи мунтахаби Қирғизистон барои доир кардани бозии охирини гурӯҳи Б-и Осиё бо тими мунтахаби Тоҷикистон дар силсилаи бозиҳои интихобии Ҷоми ҷаҳон- 2018 ва Осиё- 2019 бо 20 бозингар ба Душанбе ҳозир шуд. Меҳмонон таҳти роҳбарии сармураббиашон Александр Крестини рус шоми дирӯз аввалин тамринашонро дар варзишгоҳи марказӣ барпо карданд.
Бозии мунтахаби Тоҷикистон ва Қирғизистон пагоҳ соати 18 дар варзишгоҳи марказии пойтахт ҷараён мегирад.
Ёдрас мешавем, ки бозии аввали ин дастаҳо дар шаҳри Бишкек бо натиҷаи 2 бар 2 ҷамъбаст шуда буд ва дастаи мунтахаби Қирғизистон аз зинаи сеюми гурӯҳ новобаста ба бозии охирин бо тими мунтахаби Тоҷикистон ба бозиҳои ниҳоии Ҷоми Осиё- 2019 роҳхат ба даст овард.