Мусодираи беш аз 13 кило маводи ҳашиш дар вилояти Суғд

Душанбе, 25.03.2016. (АМИТ «Ховар»).-23 марти соли равон дар натиҷаи гузаронидани чорабиниҳои фаврӣ-ҷустуҷӯӣ аз ҷониби кормандони ШВКД дар ноҳияи Б. Ғафуров сокини 37-солаи шаҳраки Ғафуров, ки қаблан бо моддаи 200 қисми 4 Кодекси ҷиноятии Ҷумҳурии Тоҷикистон суд шудааст, бо гумони муомилоти ғайриқонунии маводи мухаддир дастгир  шуд. Дар вақти кофтукови шахсӣ аз дастгиршуда 12 килою 105 грамм маводи нашъадори навъи ҳашиш дарёфт ва мусодира гардид.

Ҳамчунин дар ин рӯз зимни як чорабинии фаврӣ дигар кормандони ШВКД дар шаҳри Гулистон сокини 41-солаи шаҳри Хуҷандро бо ҷурми даст доштанаш дар чунин ҷиноят дастгир намуданд. Дар вақти кофтукови шахсӣ аз гумонбаршуда 1 килою 25 грамм маводи ҳашиш дарёфт ва мусодира шуд.

Ҷамъи маводи нашъадори мусодирашуда 13 килою 130 граммро ташкил медиҳад.

Нисбат ба далелҳои мазкур парвандаи ҷиноятӣ оғоз гардида, тафтиш идома дорад.