Парвандаи ҷиноятӣ нисбат ба қочоқчиёни бензин

Душанбе,11.03.2016. (АМИТ «Ховар»).- Кормандони Хадамоти гумруки назди Ҳукумати Ҷумҳурии Тоҷикистон сокини ноҳияи Бобоҷон Ғафурови вилояти Суғдро барои интиқоли ғайриқонунии сӯзишвории бензин боздошт намуданд.
Кормандони шуъбаи мубориза бар зидди ҳуқуқвайронкуниҳои гумрукии Раёсати минтақавии гумрукӣ дар вилояти Суғд муайян кардаанд, ки шаҳрванд Нурулло Нурматов 64 ҳазору 800 литр сӯзишвории бензинро бе барасмиятдарории гумрукӣ ба таври қочоқ аз Ҷумҳурии Қирғизистон ба қаламрави Ҷумҳурии Тоҷикистон интиқол додааст.
Аммо ӯ бо ин амали худ қаноат накарда, дар якҷоягӣ бо ронандагон Мубинҷон Абдусаломов, Ҷумабой Абдусаломов ва Муқимҷон Ҳасанов дар се воситаи нақлиёти боркашоне, ки барои интиқоли гази моеъ пешбинӣ шудаанд, бо вазни умумии 64 ҳазору 800 литр сӯзишвории бензинро бо супоридани борхалтаҳои қаблан истифодашуда ва декларатсияҳои боҷи гумрукӣ барои маводи сӯзишвории навъи бензин ва маҳсулоти гази моеъ аз вилояти Суғд ба самти шаҳри Душанбе пинҳонӣ аз кормандони гумрук бо роҳи қочок ворид кардааст.
Воситаҳои нақлиётие, ки бо сӯзишвории бензин ғайриқонунӣ интиқол гардидаанд, аз ҷониби кормандони гумрук дар ҳудуди шаҳри Душанбе боздошт гардиданд.
Арзиши умумии сӯзишвории дарёфтгардида 265 ҳазору 827 сомониро ташкил медиҳад.
Аз рӯи ин ҳодиса нисбат ба шахсони қонуншикан бо дастрасии моддаи 289 қисми 1-и КҶ Ҷумҳурии Тоҷикистон парвандаи ҷиноятӣ оғоз шудааст.