Ҳамкории ҷавонон бо мақомоти корҳои дохилӣ таҳким меёбад

Душанбе, 14.04.2016 /АМИТ «Ховар»/. Дирӯз дар Вазорати корҳои дохилии Ҷумҳурии Тоҷикистон мулоқоти роҳбарияти вазорат бо гурӯҳи ҷавонони «Пешоҳанг», намояндагони Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон, намояндагон аз масҷидҳои ҷомеаи шаҳри Душанбе, кормандони мақомоти корҳои дохилӣ ва курсантони Вазорати корҳои дохилӣ доир гардид.
Мақсади вохӯрӣ аз мустаҳкам намудани ҳамкории ҷавонон бо мақомоти корҳои дохилӣ, пешгирии шомилшавии ҷавонон ба ҳизбу ҳаракатҳои ғайриқонунӣ, аз қабили гурӯҳҳои террористию экстремистӣ, ҳамчунин суҳбати озоду самимӣ бо ҷавонон ва қадрдонӣ намудани нафароне, ки дар мубориза бар зидди ҷинояткорӣ ва таъмини амният саҳми арзанда гузоштаанд, иборат буд.
Зимни чорабинӣ зикр гардид, ки имсол соли чорабиниҳои муҳими сиёсӣ аст ва мо барои пешбурди ҷомеа дар ҳама соҳаҳои ҳаёт бояд дар якҷоягӣ саъю кӯшиш намоем.
Дар анҷоми мулоқ шаҳрвандоне, ки дар мубориза бар зидди ҷинояту ҷинояткорӣ ва дарёфт намудани силоҳу аслиҳа саҳми арзанда гузоштаанд, бо туҳфаҳои хотиравӣ қадрдонӣ карда шуданд.