Ҳамкории Ҷопон дар бозсозии мактабҳои деҳот

Душанбе, 26.04.2016 /АМИТ «Ховар»/. Дар деҳаи ба номи Саъдии Шерозии ноҳияи Вахш сохтмони Мактаби таҳсилоти миёнаи умумии (МТМУ) №29 ва дар деҳаи  «Сомонобод»-и ноҳияи Бохтар бунёди МТМУ №8 ба анҷом расид.
Ин мактабҳо дар доираи лоиҳаи кумакҳои бебозгашти Ҷопон бо сарфи беш аз 200 ҳазор доллари ИМА сохта шуданд. Ба ҷуз ин дар чаҳорчӯби тарҳи мазкур ба шуъбаи ҷарроҳии беморхонаи марказии ноҳияи Шаҳритус таҷҳизоти муосири амалиётӣ бо арзиши қариб 88 ҳазор доллари амрикоӣ дастрас гардид.
Аз ҷониби ин барнома ба хотири беҳсозии сатҳи хизматрасонии тиббӣ ба аҳолӣ ба дармонгоҳи минтақавии №1-и ҷамоати деҳоти «Наврӯз»-и ноҳияи Носири Хусрав низ дастгоҳҳои замонавии тиббӣ, ки арзиши умумиашон беш аз 100 ҳазор доллари амрикоист, тақдим шуданд.