Баргузории раъйпурсӣ -шаҳодати рушди равандҳои демократӣ дар Тоҷикистон

Душанбе, 20.04.2016,/АМИТ «Ховар»/. 22 майи соли 2016 рӯзи баргузории раъйпурсӣ аст. Ин маъракаи сиёсӣ бо мақсади бунёди як ҷомеаи демократӣ, ҳуқуқбунёд, дунявӣ дар Ҷумҳурии Тоҷикистон ниҳоят зарур мебошад. Раъйпурсӣ яке аз тадбирҳои дар сатҳи зарурӣ мукаммал гардонидани конунгузории миллӣ, ворид кардани тағйиру иловаҳо ба Конститутсияи Ҷумҳурии Тоҷикистон, равшанӣ андохтан ба масоили ҳуқуқии сохторҳои шохаҳои ҳокимият ва амсоли он ба ҳисоб меравад. Ҷумҳурии Тоҷикистон уҳдадориҳои хешро дар арсаи байналмилалӣ дар сатҳи зарурӣ иҷро намуда, дар амалӣ намудани сиёсати дохилӣ кадамҳои устувор гузошта, сиёсати хориҷиашро дар заминаи асосҳои сулҳҷӯёна ва дарҳои боз ба роҳ мондааст. Аз ин рӯ, бо мақсади боз ҳам тақвият ёфтани сиёсати дохилӣ, инчунин ба талаботи замони муосир мутобиқ гардонидани сохт ва шакли давлатдорӣ, зарурати гузаронидани раъйпурсӣ пеш омадааст. Ин раъйпурсӣ на танҳо ба нафъи миллати тоҷик, балки барои барқарор кардани муносибатҳо бо давлатҳои дуру наздик ва созмонҳои байналмилаливу минтақавӣ, ки Тоҷикистон бо онҳо муносибати дӯстона дорад, як фазои мусоиди ҳамкории қавӣ ва демократӣ ба вуҷуд меорад.
Раъйпурсии Ҷумҳурии Тоҷикистон овоздиҳии умумихалқӣ буда, тағйиру иловаҳо ба Конститутсияи (Сарқонуни) Ҷумҳурии Тоҷикистон танҳо бо роҳи раъйпурсӣ, яъне овоздиҳии умумихалқӣ ворид карда мешаванд.
Мардуми тоҷик хушбинона аз ин раъйпурсӣ истиқбол мекунад, зеро оромии кишвар, сулҳу субот, ваҳдати милливу истиқлолияти кишвар ба сатҳи баргузории он, таклифу пешниҳодоти мушаххаси шаҳрвандон вобаста аст. Итминони комил дорем, ки ин маъракаи сиёсӣ дар сатҳи баланд баргузор мегардад. Ҳоло чорабиниҳо доир ба омодагӣ ва баргузории ин маъракаи муҳими сиёсӣ дар саросари ҷумҳурӣ ҳамаҷониба идома дошта, барои дар сатҳи баланди ташкилӣ баргузор шудани он дар Тоҷикистон 68 ҳавза ва 3239 участкаи раъйпурсӣ ташкил карда шудааст.

Ҳикматулло Хоҷаев,
сиёсатшинос