Бояд аз имконият барои таълиму тарбия босамар истифода намуд

Душанбе, 26.04.2016. /АМИТ «Ховар/. Ҳолати  имрӯзаи сиёсӣ, иҷтимоӣ ва фарҳангии кишвар, вазъи ҷинояткорӣ миёни наврасону ҷавонон, роҳҳои пешгирии ҷинояту ҷинояткорӣ дар ҷомеа, инчунин масоили марбут ба раъйпурсии умумихалқӣ   дар Донишкадаи соҳибкорӣ ва хизмати кишвар  зимни мулоқот бо устодону донишҷӯён  баррасӣ гардид.  Дар он масъулини Вазорати корҳои дохилӣ, Вазорати маориф ва илм ва Комиссияи марказии интихобот ва раъйпурсӣ иштирок намуданд.
Ректори  донишкада, профессор Қодирзода Диловар Баҳриддин  атрофи тадбирҳои пайвастаи роҳбарияти донишкада ҷиҳати пешгирии ҷинояту ҷинояткорӣ миёни донишҷўёну хонандагон, омодагии участкаи раъйпурсии дар назди донишкада амалкунанда ба раъйпурсии умумихалқӣ  ҳарф зад.
Сардори  раёсати кадрҳо ва кор бо ҳайати шахсии Вазорати корҳои дохилии Ҷумҳурии Тоҷикистон Раҳимзода Абдураҳим Абдураҳмон роҷеъ ба вазъи ҷинояткорӣ миёни наврасону ҷавонон, роҳҳои пешгирии ҷинояту ҷинояткорӣ дар ҷомеа, бахусус миёни ҷавонону наврасон гуфт, ки соли равон ҷинояту ҷинояткорӣ миёни наврасону ҷавонон ба маротиб кам шудааст, вале он моро қонеъ карда наметавонад. То ҳол баъзе  ҳамватанони мо дар набардҳои Сурияву Ироқ иштирок менамоянд, ки ин боиси нигаронист. Ин  ҳолат гувоҳи беандешагӣ ва дорои маърифати пасти сиёсӣ будани нафаронест, ки дар ин набардҳои бемаънӣ иштирок мекунанд.
Мақсади мулоқот ба ҷавонон фаҳмонидани оқибатҳои гаравиш ба гурӯҳҳои тундраву ифротгаро ва пешгирии раванди шомилшавии онҳо ба ин гурӯҳҳо арзёбӣ гардид.
Зикр шуд, ки имрӯз вақти он аст, ки ҷавонону наврасони мо аз имкониятҳои барои таълиму тарбия фароҳам сохтаи давлату ҳукумати мамлакат босамар истифода намоянд, маърифату маънавиёти худро комил созанд ва дар оянда ҳамчун шахси неку соҳибмаърифат ва мутахассиси варзидаи ҷомеа соҳиби эътибору обрӯ гарданд.