Дар ҳамаи шаклҳои хоҷагидории Хатлон истеҳсоли маҳсулоти кишоварзӣ афзоиш ёфт

Душанбе, 18.04.2016 /АМИТ «Ховар/. Таҳлили нишондиҳандаҳои макроиқтисодӣ дар семоҳаи якуми соли равон нишон дод, ки мақомоти иҷроияи ҳокимияти давлатии шаҳру ноҳияҳо ва ташкилоту идораҳои вилояти Хатлон фаъолияти корбариро аз рӯи иҷрои дурнамо, барномаҳо ва нақшаҳои тасдиқгардида амалӣ намуда, бо истифода аз захираҳои дохилӣ рушди иқтисодиёти вилоятро бо натиҷаҳои мусбат ҷамъбаст намуданд.
Дар давраи сипаригардида маҷмӯи маҳсулоти минтақавӣ ба 1 миллиарду 979 миллион сомонӣ расид, ки дар муқоиса бо ҳамин давраи соли гузашта 283 миллион сомонӣ зиёд ва афзоиш 6,6 фоизро ташкил дод. Ин нишондиҳанда ба сари ҳар як нафар аҳолӣ 649 сомониро ташкил дод, ки нисбат ба ҳамин давраи соли гузашта 80 сомонӣ зиёд мебошад.
Дар ин давра иҷрои нақшаи қисми даромади буҷети маҳаллӣ 113 фоиз таъмин шуда, ба буҷет 192 миллион сомонӣ ворид гардид, ки нисбат ба нақшаи пешбинишуда 21,6 миллион сомонӣ ва ҳамин давраи соли 2015-ум 56,4 миллион сомонӣ зиёд мебошад.
Дар ҳамаи шаклҳои хоҷагидорӣ ба маблағи 415,7 миллион сомонӣ маҳсулоти кишоварзӣ истеҳсол карда шуд, ки нисбат ба ҳамин давраи соли гузашта 5 фоиз зиёд аст.