КМТ донишҷӯёнро ба китобхонӣ даъват намуд

Душанбе, 28.04.2016./АМИТ«Ховар»/. «Даъват ба китобхонӣ  ва Китобхонаи миллӣ»- чунин ном дошт мулоқоте, ки  дирӯз дар   Донишгоҳи миллии Тоҷикистон бо  иштироки  донишҷӯёну  устодон ва  сардорони шуъбаҳои Китобхонаи миллии Тоҷикистон  баргузор гардид.
Дар ҷамъомад Абубакр Аминов, сардори шуъбаи маркетинг ва менеҷменти  Китобхонаи миллӣ донишҷӯёнро ба  китобхонӣ даъват намуда,  зикр намуд, ки  миёни хонандагони онҳо донишҷӯёни Донишгоҳи миллии Тоҷикистон қисмати зиёдро ташкил медиҳанд. Аз ҷумла,  дар семоҳаи аввали соли равон 3108 донишҷӯ ба узвияти Китобхонаи миллӣ пазируфта шудаанд.
Ҷамил Валиев, сардори шуъбаи илмӣ-таҳқиқотӣ ва Фотима Ёқубова, сардори шуъбаи хизматрасонии махсус   ба иштирокдорони вохӯрӣ дар бораи фаъолияти китобдорӣ,  омадани донишҷӯён ба Китобхона ва чорабиниҳои ҳармоҳаи он барои афроди дорои имконияти маҳдуд маълумоти муфассал доданд.
Дар қисми дуюми барнома Назира Толибова, сармутахассиси шуъбаи маркетинг ва менеҷменти фаъолияти китобдорӣ дар бораи хизматрасониҳои шартномавӣ ва Фаридун Азизов дар бораи толорҳои хониш бо истифода аз асбобҳои аёнӣ ба ҳозирин маълумот доданд.
Барно Самиева, корманди Китобхона дар бораи варақаҳои таблиғотӣ  маълумот дода,  намунае аз онҳоро миёни ҷамъомадагон тақсим кард.
Дар фарҷоми мулоқот  кормандони Китобхонаи миллӣ  донишҷӯёнро  ба китобхонӣ ва китобхона даъват намуда, таъкид намуданд, ки аз чунин шароит ва имконияте, ки имрӯз давлату Ҳукумати мамлакат барои онҳо фароҳам овардааст, самаранок истифода бурда, савияи дониши худро баланд бардоранд.