«Reuters»: Бар асари таркишҳо дар Нигерия на кам аз 8 нафар ҳалок гардиданд

Душанбе, 22.04.2016 /АМИТ «Ховар»/. Бар асари амали террористӣ дар шимолу шарқи Нигерия на кам аз 8 нафар ба ҳалокат расида, 12 тани дигар ҷароҳат бардоштанд. Дар ин бора рӯзи ҷумъа агентии «Reuters» хабар дод.
Бино ба иттилои манбаъ, таркишҳо дар шаҳраки Банки, дар канори иёлати Борно, наздик ба сарҳади Камерун ба амал омадаанд. Ду террористи маргталаб, ки қаблан гуреза ҳисобида мешуданд, худро дар бошгоҳ тарконидаанд. Таркиши аввал тахминан соатҳои 8 субҳ ва таркиши дуввум чанд дақиқа пас ба амал омадааст, ки дар натиҷаи ин амалҳои террористӣ 8 кас ҷон бохта, 12 тани дигар ҷароҳат бардоштаанд.