Вазорати кишоварзӣ: фаъолияти семоҳа ҷамъбаст гардид

Душанбе, 18.04.2016 /АМИТ «Ховар»/. Дар Вазорати кишоварзӣ оид ба «Натиҷаи ҷамъбасти фаъолияти Вазорати кишоварзии Ҷумҳурии Тоҷикистон дар семоҳаи аввали соли 2016 ва вазифаҳои минбаъда» маҷлиси ҳайати мушовара таҳти роҳбарии вазири кишоварзии Ҷумҳурии Тоҷикистон И. Сатторӣ баргузор гардид.
Муовини вазири кишоварзӣ оид ба «Натиҷаҳои ҷамъбасти фаъолияти вазорат дар семоҳаи якуми соли 2016 ва вазифаҳои минбаъда» сухан кард. Вазири кишоварзӣ ҳисоботи роҳбарони сохторҳои вазоратро дар мавриди натиҷаҳои фаъолият дар семоҳаи якуми соли 2016 оид ба рушди соҳаи чорводорӣ, растанипарварӣ, захираи тухмӣ, техникаи кишоварзӣ пурсон шуда, барои дар муҳлати муайяншуда ва ҳолати хуби агротехникӣ ба анҷом расонидани кишти пахта, истифодаи тухмии истеҳсоли ватанӣ, истеҳсоли маҳсулоти гӯштӣ, махсусан гушт ва тухми мурғ, ниҳолпарварӣ, ҷалби кадрҳои ҷавон ба соҳаи кишоварзӣ ва андешидани тадбирҳои мушаххас дар ин самт дастуру супоришҳои мушаххас дод.