Ғалабаи сеюми пайдарпаи «Севиля» дар Лигаи Аврупо

Душанбе, 19.05.2016 /АМИТ «Ховар»/. Дар вохӯрии ниҳоии Лигаи Аврупо шоми дирӯз дастаҳои «Ливерпул»-и Англия ва « Севиля»-и Испания дар варзишгоҳи «Санкт-Якоб Парк»-и шаҳри Базели Швейтсария  бо ширкати бештари мухлисони «Ливерпул» вориди рақобат шуданд ва бозӣ бо пирӯзии «Севиля» бо ҳисоби 3 бар 1 ба анҷом расид.
Ду мураббии мӯъҷизаофар-Юрген Клопп ва Унаи Эмерӣ ба мухлисон спектакли ҳақиқии нонавиштаи бозии ниҳоиро пешниҳод карданд, ки ҳаловаташ дер боз аз хотири мухлисони футбол зудуда нахоҳад шуд.
«Ливерпул» баъди  голи Даниэл Стариҷ дар нимаи аввал ба сафи пеш баромад ва бо ҳамин як гол дастаҳо ба танаффус рафтанд.
Сармурабии «Севиля» Унаи Эмери ба футболбозонаш дар танаффус чӣ гуфт, онро аз бозии нимаи дуввум эҳсос кардан мумкин буд. Услубу тактикаи бозӣ тамоман тағйир ёфта буд. Дар сонияҳои аввал Кевин Гамейро натиҷаро ба мусовӣ кашид ва ду голи Коке «Севиля»-ро пайдарпай ба гирифтани Ҷоми лигаи Аврупо мушарраф гардонид.
Ин ғалаба  имкон дод, ки бори аввал дар таърихи ин бозиҳо як даста се маротиба паси ҳам ин ҷоизаро ба даст орад ва соли оянда ба қатори иштирокдорони Лигаи чемпионҳои Аврупо шомил шавад.