Ғамхорӣ зоҳир намудан барои насли наврас вазифаи калонсон аст

Душанбе, 31.05.2016 /АМИТ «Ховар»/. Бахшида ба Рӯзи байналхалқии ҳифзи кӯдакон, ки ҳамасола 1 июн таҷлил мешавад, дар тамоми гӯшаву канори Тоҷикистон чорабиниҳои гуногун,  аз ҷумла маъракаи хайрия барои кӯдакон баргузор мегарданд.
Чунин чорабинӣ дар ташкилоти ҷамъиятии «Эҳё ва дастгирӣ»-и шаҳри Қурғонтеппа баргузор гардид.
Дар чорабинӣ аз тарафи бахши ҳуқуқи кӯдаки мақомоти иҷроияи ҳокимияти давлатии вилояти Хатлон, роҳбари ташкилоти Ҷамъияти Ҳилоли Аҳмар ва Ташкилоти ҷамъиятии «Эҳё ва тараққиёт» ба 15 нафар кӯдакони маъюби имкониятҳои ҷисмониашон маҳдуд кумаки яквақтаина- маводи хӯрокӣ, маводи конселярӣ ва бозичаҳои кӯдакона тақдим карда шуданд.
Намоишномаи театрикунонидашуда чорабинии фарҳангиро рангинтар намуд.
Мавриди зикр аст, ки Рӯзи ҳифзи кӯдакон моҳи ноябри соли 1949 бо қарори иҷлосияи Федератсияи байналмилалии демократии занон таъсис ёфта буд. Сипас, бори аввал «Рӯзи байналмилалии ҳифзи кӯдакон» соли 1950 дар 51 кишвари ҷаҳон таҷлил гардид.
Ба бовари гурӯҳе аз соҳибназарон, набояд танҳо бо 1-уми июн иктифо намуд ва аз ин рӯз бояд ба таври ҳамешагӣ таҷлил кард, то ҳамарӯза диққати калонсолонро ба мушкилоти имрӯзаи кӯдакон ҷалб намуд. Ҳадафи дигар- ин таваҷҷуҳу ғамхорӣ зоҳир намудан ва таъмини зиндагии арзанда барои насли наврас мебошад.